Manchester United captain Bruno Fernandes chu hliam tenau tuar chungin khelmualah a la inlan reng tih tarlang mah se, head coach Michael Carrick chuan a theihna sang tak a rawn chhuah leh "thuai" a rin tlat thu a sawichhuak.

Champions League-a Atletico Madrid an hmachhawn ṭum khan, Fernandes hi tlar hma dinglam sir aṭanga khelhtir a ni a, mahse a khel ṭha tawk lo hle a, minute 80-naah lakchhuah a ni ta nghe nghe a ni. August thlaa Ipswich laka 5-2 a an chak ṭum khan hat-trick khung mah se, tun season chhung hian season liam taa a theihna ropui tak kha a la pholang thei meuh lo a, a season bul ṭan danah Fernandes ngei pawh a lungawi lo hle tih Carrick chuan a pha lo.

Carrick chuan season inṭan tirh vela thil thlengte sawiin, "Season inṭan tirh lamah hian result emaw goal khung kawngah beisei phak lohna leh lungawilohna tlem a awm tih chu phat rual a ni lo. Mahse, hei hi Bruno-a chungchang chauh a ni lo va, kan zavai chungchang a ni zawk. Match hnih khat vel kan beisei anga a kal loh hian mi ṭhenkhat chuan 'a hma pawhin hetiang hi a thleng tawh, a thleng nawn leh dawn a nih hi' tih rilru put nghal mai an ching ṭhin a, chu chu kan thil ngaihven ber tur a ni lo," tiin a sawi.

Head coach chuan sawi zawmin, "Kan theihna sang berah engtin nge kan kir leh theih ang tih zawk hi kan ngaihtuah tur chu a ni. Thil ṭha tam tak kan nei a, zan hmasa inkhel aṭang pawh khan hmalam pan nana hman zui theih thil ṭha tam tak a awm. Kan team boruak leh kan rilru puthmangah hian 'a ngai kan chuankai leh ta' tih rilru chhia hi a awm tur a ni lo va, he football club dressing room chhungah hian a awm thiang lo hrim hrim bawk. Eng nge kan tih theih tih hi kan ngaihtuah a ngai a, chu chu keima ngaihdan pawh a ni. Chutiang dinhmun thleng tur chuan thil ṭhenkhat kan tih a ngai a, hei hi mimal pakhat hna chauh a ni lo va, kan zavai mawhphurhna a ni," a ti.

Team-a player dangte mawhphurhna chungchang an zawhna chhangin, Carrick chuan squad pumpuiin thapui an thawh a ngaih thu a sawi lang bawk. "Kawng hrang hrangin mawhphurhna hi kan insem a ngai a ni. Thawhrimna lamah te, theihna thehchhuah kawngah te, khelmuala inlan kawngah te pawh a ni vek. A chang chuan player-te an ni a, a changin staff-te, a chang phei chuan kan mamawh ber laia min ṭanpui ṭhintu kan fan-te pawh an ni ṭhin. Thil a ṭhat vek laia Bruno-a chauh a ni ngai lo ang bawkin, thil a kal fuh tawk loh chang pawhin Bruno-a vang chauh a ni hek lo. Kan group-ah hian nghawng lian tak a nei a, squad pum tan mi pawimawh tak a ni," tiin a sawi.

Carrick chuan Fernandes chu fak zuiin, "Ani chu footballer ropui tak a ni a. Nikum lama chanchinbu hmai a luah hneh ang em ema a la langsar lo a nih pawhin, a ti thei lo tihna a ni lo va, a theihna a phochhuak leh thuai ang tih ka chiang a ni," tiin a sawi belh bawk.

Atletico laka an inkhelh ṭuma Fernandes an lakchhuah chhan chu a hliam vang a nih loh thu Carrick hian a nemnghet a, mahse a taksaah harsatna tenau a la nei reng tih erawh a zep lo. "A hmaa ka lo sawi tawh ang khan, eng emaw harsatna tenau chu a nei reng a ni. Player tam tak hian hetiang hi an nei ṭhin a, mite hriatpui lem lohin an khel tlang mai ṭhin; mipui chuan mi zawng zawng hi 100% fit-ah an ngai mai ṭhin a, mahse a nih loh chang a tam hle. Bruno hian harsatna tenau a nei ngei a, mahse tunah chuan a dam fel thawkhat tawh a, a theihna sang berah a lo kir leh thuai dawn a ni," tiin a sawi zui bawk a ni.