Old Trafford-a Champions League match-a Roma an hmachhawn hmain, Manchester United midfielder Kobbie Mainoo chuan an head coach Michael Carrick-a tana ṭahnemngai taka "khelmual chhung leh pawnah" ṭan la turin a team-mate-te a ngen ta.
Season hmang ṭha lo tak, inelna hrang hranga a zawnin match 9 chhung chak nei lo (winless) mek United-ah hian head coach Carrick chu pressure lian tak hnuaiah a awm mek a ni. Player-te hi hemi chhung zawng hian sawiselna laka venhim a lo tum char char a, thla liam taa Champions League-a Como laka an tlawm ṭum chiah khan a thinrimna a phochhuak a ni. Mahse, hetianga coach-in a thlawp tlat chung hian senior player ṭhenkhat chet dan erawh a pawi hle a; Lisandro Martinez-a'n club hotute a sawisel laiin, captain Bruno Fernandes pawhin Como laka an tlawm hnu khan Carrick-a tactics a lo sawisel tawh bawk a ni.
Hliam avanga match 4 chhung inlan thei lo, Inrinni-a Chelsea nen an inkhelh ṭuma bench aṭanga rawn inlan leh chauh kum 21 mi Mainoo hi Thawhlehnia Roma nen an inkhelh hunah bul ṭan leh tura beisei a ni a. Carrick-a'n player-te a lo hum ṭhinna zawng zawng rulh let nan team pumpui inṭangrual tura a duh thu sawiin Mainoo chuan, "Khelmual chhung leh pawnah manager hi kan thlawp a ni tih lantir a, team anga ṭang rual a, kan thawhho nan hian a aia nasain kan beih a ngai a ni," tiin a sawi.
Mainoo chuan sawi chhunzawmin, "Tun season chu season harsa tak a ni a. Kan duh ang result kan hmu lo a ni maithei, mahse tunah chuan hma lam kan thlir a ngai tawh a ni. Match lian tak tak kan hmachhawn dawn a, game khat lek hnehna kan chan hian boruak thleng danglam vek thei niin ka hria. He club-ah hian hun rei tak ka awm tawh a, hlawhtling zawng zawng leh hlawhchhamna a awm ṭhin tih ka hria. Hmasawnna kawng hi a tluang purh dawn lo tih ka hria a, chuvangin buaina a rawn thlen chang pawhin indawm kun lova rawn tho chhuak leh thei nih hi a pawimawh ber a ni," a ti bawk.
Old Trafford-a an match hnuhnung bera Bournemouth laka 3-0 a an tlawm ṭum khan inkhelh zawhah Stretford End-a fan-te chuan player-te laka an lungawi lohna an pholang nasa hle a, banner-ah 'Standards' tih hial an ziak a nih kha. United academy chhuak leh amah ngei pawh club ṭantu ni bawk Mainoo chuan fans-te lungawi lohna chu a hriatthiampui hle. "Result ṭha kan thlen zawh loh lai hian fans-te hian vawi 100% min thlawpin an hlim reng ang tih kan beisei thei lo. Chuvang chuan an pual ngeia result ṭha thlen sak leh hi kan bat a ni," tiin a sawi.
Mainoo chuan, "United hi club lian tak a ni a, helai hmuna lo thawk tawhte leh lo khel tawhtaten an lo hawn ṭhin club hlutna (values) hi mi tam takin an hria a ni. Academy aṭanga rawn ṭhanlen chhoh pui ka nih angin, Manchester United nihna tak tak hi mipuite hnena tarlang zel tur hian mawhphurhna engemaw zat ka nei in ka hria a, he thuchah hi a thui thei ang ber rawngbawl chhunzawm zel ka tum a ni," tiin a sawi bawk.
Carrick hian January thla khan Ruben Amorim-a hmunruak luahin United manager hna hi a zawm a. Hemi hma khan Portuguese coach Amorim-a hnuaiah Mainoo hi hmun chang lovin kalsan rih a lo ni tawh a, Carrick-a rawn thlen hnu chiah khan first team-ah lakluh nawn lehin hmun pawimawh a pe ta a ni. Carrick-a hnuaia a hmasawnna chungchang sawiin Mainoo chuan, "A rawn thlen tira min rinna min pe a, fuihna leh thurawn ṭha tak tak min pe avang hian manager lakah hian ka lawm em em a ni. He club chanchin leh hlawhtling tura mamawhte hre kilkel lo inlan tawh player hlui a ni tih hriain, a thusawite hi ka thinlungah ka vawng tlat a, training leh match-ah nitin hman ka tum ṭhin," a ti.
Carrick-a hnuaiah United hian season bul ṭan ṭha lo mah se (match 13-ah vawi 2 chauh an chak a, 1988 hnua a vawikhat nan match 9 zawn inelna hrang hrangah winless an nei mek), Roma lakah hian chak ngei tumin Old Trafford-ah an inbuatsaih mek a ni.
