Manchester United head coach Michael Carrick chuan Elland Road-a Leeds United nen 1-1 a an inhnehtawk hnuah, a naute chu kawng dik zawhin hma an sawn chhoh ṭan a rin thu leh dinhmun ṭha zawk an pan theih a beisei tlat thu a sawi chhuak.

United hian inelna hrang hrangah a zawnin match ruk ngawt mai chak nei tawh lo mah se, tun season chhung zawnga match 10 an khelh tawhah vawi hnih chiah la chak mah se, West Yorkshire mualah erawh hmasawnna hmuh tur a awm niin a hria a ni.

He inkhelah hian first-half-ah Bryan Mbeumo-a'n goal thunin United hi hma a hruaipui phawt a, mahse chawlhlawk hnuah Leeds tan Dominic Calvert-Lewin chuan an siphurh a rawn sut leh a. Khelmual chhungah khelh dan phung mawi leh theihna sang tak hmuh tur a awm reng lo chung pawhin, an khelh danah chuan dinhmun ṭha zawk an pan theihna tura beiseina par chhuak a hmuh theih niin Carrick chuan a ngai a ni.

Season ṭan tirha beiseina sang tak nei chunga bul an ṭan hnuah, beisei loh taka an chet chhiat em avangin, ni hnih liam ta chhung khan a player-te chuan he dinhmun harsa aṭanga talchhuak tur hian theih tawp chhuahin an thawkrim nawn leh hle tih a hria a ni.

Carrick chuan, "Game kan chak loh miau avangin phur lutuk leh lawm hluai tur chu kan ni lo, mahse thil dik tak leh chhan ṭha tak vanga thil i tih chhunzawm reng chuan, a tawpah chuan i phu tawk i hmu ngei ṭhin a ni. Vawiin thil thleng hi bul ṭanna thar ang maia ngaih theih a ni a, kan dinhmun dik tak kan pawm a, chumi siamṭha tura ke kan pen ṭan a nih ka ring," tiin a sawi.

Carrick chuan sawi chhunzawmin, "Player-te hian an ṭhiante tan theih tawp chhuah an duh zia leh, he football club tana an khel thei hi an hlut zia a tilang chiang hle a ni. Ni hnih liam ta chhung khan squad chhungah tum ruhna tak tak a awm a, chu chu khelmual chhungah an rawn phawrh chhuak a ni. Vawiin inkhel kha a harsa em em a, an khelh dan kha a khirh hle a, a harsa thei ang berin an min nawr a, mahse ka naute khan huaisen takin an hmachhawn a ni," a ti bawk.

United hi tun dinhmunah Premier League-ah 13-naah an awm mek a, kum 40 chhunga league campaign an ṭan chhiat ber ṭum a ni hial a ni. Carrick pawhin an result neih mekte chu a ṭha tawk lo tih a pawm rualin, a team tan thil a la inher danglam thuai dawn tih a ring tlat thung.

Carrick chuan, "Engkim a ṭha vek e tih zawnga thil pawm chu ka tum lo bur a, dinhmun tak tak ka thlir a ni. Mahse a chang chuan harsatna i tawk a, kawng dika kal theihna zawn chhuah a ngai ṭhin. Hetiang dinhmun hi kan la hmachhawn ngai meuh lo a, mahse kan paltlang ngei a ngai a ni. Helai hmunah hian hun engemaw chen chu thil kal kual ṭhin a awm a, kawng hrang hrangin a kal kual thei a ni.

"Group khat kan nih angin thil dik chu chhan ṭha tak avangin kan ti nghet char char tur a ni a, football match hneh theihna theihna chu kan nei chiang a ni. I thil thlir dan azir a ni mai a, kawng khat aṭanga thlir chuan kan dinhmun hi a ṭha lo tih ka hria e, mahse hmalam panin hlawhtlinna zawn zawh theihna hun ṭha kan la nei dawn tih ka ringhlel lo," tiin a sawi zui bawk a ni.