Premier League inelna chhunzawmin kumin kar tawpah hian Manchester United chuan khualmualah Leeds United an hmachhawn dawn a, Elland Road-ah Michael Carrick-a naute hian fiahna khirh tak an hmachhawn a ngai dawn a ni.
He inkhel a thlen hma hian Daniel Farke-a enkawl Leeds United hi Premier League table-ah pasarihna (7-na) dinhmun luahin an che ṭha hle a, 13-naa awm mek Manchester United ai hian point thumin an sang zawk a ni. United manager Michael Carrick hian August thlaa Old Trafford-a Ipswich Town 5-2 a an lehthal hnu khan Premier League-ah hnehna a la la miah lo a, league match hnuhnung lamah point hmuh an harsat hle.
Red Devils hi inelna hrang hrang khelh zawh tak pangaah chak hmel an la hmu miah lo a, an hnehna chan hnuhnun ber chu September thlaa Champions League-a Sabah 4-0 ngawta an sawp ṭum kha a ni. Kha match hnu aṭang khan Carrick-a naute hian vawi hnih inhnehtawkin vawithum lai tlawmna an tawng tawh a ni. Thawhlehni zan Champions League inkhelah pawh Metropolitano Stadium-ah Atletico Madrid laka 2-0 a an tlawm hnuah, Leny Yoro hnawhchhuah a nih avangin mipa 10-in an khel a nih kha.
He inkhel pawimawh tak hmachhawn tur hian United legend pahnih Roy Keane leh Gary Neville te ngaihdan a inmil lo hle. The Overlap huaihawt 'Stick to Football' podcast-ah Ian Wright leh Jill Scott te nena an titi dunnaah, Keane chuan United hian point khat chauh an hlawhchhuah a rin thu a sawi.
Keane chuan, "1-1 a inhnehtawk ka ring," tiin a sawi a, "Khualmuala khelh tur a nih miau avangin inhnehtawk pawh a ṭha tawk viau e," tiin Elland Road boruak a khirh dawn zia a tarlang tel bawk a ni.
Chutih laiin, Sky Sports pundit Jamie Carragher-a aiawha rawn inlan Liverpool legend Steven Gerrard-a nena an sawiho naah, kum 51 mi Gary Neville erawh Keane aiin a beiseina a sang zawk hle a. United captain hlui hian Carrick-a nauten Elland Road-ah point thum pawimawh tak an hlawhchhuah ngei a beisei tlat thung.
Neville chuan, "Man Utd hi 2-1 in an chak ka ring," a ti a. Sawi chhunzawmin, "Thu dik tak sawi dawn chuan, en chhin teh u, Matheus Cunha, Bryan Mbeumo, Amad Diallo leh Marcus Rashford te in kawl a nih ngat chuan... 2-1 a an chak ka ring tlat a ni," tiin United tlarhma theihnaah rinna a nghah tlat thu a sawi chhuak a ni.
Elland Road-a Leeds United leh Manchester United te inkhel hi UK sanaa chhun dar 2:00-ah ṭan tur a ni a. He match an khelh zawh hnu hian, Red Devils hian Nilaini zanah Champions League inelna lam an hawi chhunzawm lehnghal dawn a, Italy ram panin Serie A club Como chu khualmualah an hmachhawn zui leh dawn a ni.
