Manchester United co-owner Sir Jim Ratcliffe-a'n United Kingdom 'tlakhniam' chungchang leh raltlan/pem luhna chungchanga a ṭawngchhuah hnuin, Manchester United Muslim Supporters' Club (MUMSC) chuan a lakah rinna an nghat tawh lo tih puangin, amah leh Glazer chhungkuate chu club chhuahsan turin thuchhuah hmangin an phut ta a ni.
Denmark-a BBC nen an inbiaknaah Ratcliffe hian UK chu a tlachhia tiin, pem luhna (immigration) leh sorkar puihna la te (benefits) chungchanga khauh zawka hmalak a ngai a ni tiin a lo sawi a. Ratcliffe chuan, "Khawvela empire ropui ber kan lo ni tawh a. Mipui ropui tak kan ni ṭhin. World War pahnih ngawtah kan chak bawk. Mahse tunah chuan immigration buaina chingfel ngam mi chhel an awm tawh lo a, benefits buaina chingfel ngam an awm tawh lo bawk. Mahse tu emaw berin an tih a ngai a ni," tiin a sawi.
Ratcliffe-a'n immigration chungchang a sawisel vawikhatna a ni lo a, kumin tir lamah pawh UK chu "immigrant te'n an luah hneh lutuk" (colonised by immigrants) tiin a lo sawi tawh a, hemi hnu hian a ṭawngkam vangin ngaihdam a lo dil tawh a ni. Mahse MUMSC chuan he a zirtirna hi a zir chhuak lo hle tiin an sawisel nawn leh a ni.
MUMSC chuan Ratcliffe-a mize pahnih nei (hypocrisy) leh a eizawnna atana sorkar sum a hman dante phawrhchhuakin, "Sir Jim-a'n Britain-a 'benefits problem' chungchang a sawi a, mahse UK sorkar hian INEOS hnathawhna puih nan ram sum £120m chuang a ruahmansak thung. Chu mai bakah Sir Jim-a hian tax residence atan Britain chhuahsanin Monaco a thlang thung a ni. Sorkar puihna hi mahni sumdawnna tana a ṭhat chuan hman pawi ti lo, mipuite sorkar innghahna chungchanga zirtirna va pek leh daih hi thil hriatthiam harsa tak a ni," tiin an tarlang.
Khelmual chhunga an chet chhiat leh club enkawl tlahniam mek chu MUMSC chuan an sawisel zui bawk. Tun kar chhung khan Old Trafford-ah Manchester United chu Carabao Cup aṭangin an tla a, hemi hnaivai khan mahni mualah player 10-a khel Manchester City lakah an tlawm bawk a ni. Premier League match 4 khelhah point 4 chiah hmuin 13-na dinhmun an luah mek bawk.
MUMSC chuan, "Kum engemaw zat chhung chu manager, player leh coaching staff-te kawk tawhin thil a thlak kual ṭhin a, mahse a kual vel (cycle) hi a danglam chuang lo. Ticket man a sang tul tul a, stadium enkawl zui lovin a chhe tual tual bawk. Manager leh player-ten he buaina hi an siam a ni lo, thutlukna siamtu hotute siam a ni," tiin an tarlang.
Old Trafford-a player, staff, steward leh fan-te chu ram hrang hrang, sakhua leh hnam hrang hrang aṭanga rawn kal an nih thu sawiin, he danglamna (diversity) hi United chakna zawk a nih thu MUMSC chuan an sawi a. "Hei hi match khat tlawmna mai a ni lo a, manager pakhat leh season pakhat ai pawhin a lian zawk a ni. Hei hi Manchester United Football Club a nihna leh hmafuhan chungchang a ni. Glazer-te leh Sir Jim Ratcliffe te hian club hi an chhuahsan tur a ni," tiin an thuchhuah an tlip a ni.
