Manchester United-in Erik ten Hag an ban aṭangin kum hnih zet liam tawh mah se, he Dutch manager hian Old Trafford club nena an inlaichinna chu a la vawng nung reng a ni. Ten Hag hian April 2022 aṭanga October 2024 inkar khan United hi kum hnih leh a chanve chhung enkawlin, a season hmasa pahnihah Carabao Cup leh FA Cup nomawite chawipuiin kum tam tak nomawi an lo lak tawh lohna chu a tihtawpsak a nih kha.
Mahse, a season thumna inṭan hmain contract thar an ziahpui tehkher pawhin, season bul an ṭan chhiat em avangin Ineos chuan an dawhtheihna an hloh a, October 2024 khan an ban ta a ni. Hemi hnu hian Bayer Leverkusen-ah hun reilote chhung manager hna a chelh a, tunah hian an ram club FC Twente-ah Technical Director hna a thawk mek a ni.
Ten Hag hian a club hlui United chanchin hi a thlithlai zui reng a, tun season 2026-27 inṭan tirh match 10 khelh tawhah vawi hnih chiah hnehna an chan avangin, an head coach Michael Carrick chu dinhmun khirh tak leh pressure nasa tak hnuaiah a ding mek tih a hai bik lo.
The Athletic chanchinbua Laurie Whitwell nena inkawmna an neihah Ten Hag chuan Manchester United a ngainat zia leh a la ngaihven zui reng zia a sawichhuak a. January thlaa an ban zui tak a thlaktu Ruben Amorim ang lo takin, Ten Hag hian club a chhuahsan hnuah pawh amah leh team lo thlawptute hnenah lawmthu sawiin boruak ṭha a la siam reng a ni.
Old Trafford-a a hun hman tawh chungchang sawiin Ten Hag chuan, "Manchester United-a ka awm chhung khan minute tin mai kha nuam ka ti a, hriatreng tur ṭha tak tak ka nei a ni. Club nen hian inzawm tlat angin ka inhria a, fan pakhat ka ni ve bawk. An supporter-te hi an ropui em em a, ka lakah zahna an lantir reng ṭhin. United hian hnehna chang reng se ka duh a, hlawhtlinna an chan nawn leh ngei ka duh a ni. Club hi an lo nih tawh ṭhinna hmun ropuiah khan kir leh se ka ti takzet a ni," a ti.
Tun season-a United chet ṭhat tawk loh avanga Carrick-a chungchangah thutlukna siam hmanhmawh lo turin Ten Hag chuan ngenna a siam zui a. "Ani ban hi chhanna a ni lo. 100 per cent-in a ni lo hrim hrim," tiin a sawi.
Ten Hag chuan sawi zawmin, "Result a ṭhat tawk loh chuan fan-te chuan ban an phut ngei ang - chu chu rilru chhungril leh thinlung so bulh bulh aṭanga chhuak a ni ṭhin. Mahse thutlukna fing leh awmze nei tak siam zawk a ngai a ni. Ani chuan Middlesbrough-ah leh season liam ta khan coaching theihna ṭha tak a nei tih a lantir tawh a. Chuvangin a kalphung leh ruahmanna chu kalpuitir rawh u. Coaching staff ṭha tak a nei bawk niin ka hria," a ti bawk.
Elland Road-a Leeds United nen 1-1 a an inhnehtawk hnuah, Michael Carrick leh a naute hian Champions League match khel turin Italy ram an pan dawn a, mualneitu Como chu khualmualah an hmachhawn zui ang.
