Old Trafford-a Tottenham nen an inhnehtawk ṭumin Manchester United-in bul an ṭan chhe hle a, mahse an insiamṭha leh thei chu head coach Michael Carrick chuan a player-te chet dan chu fakawm a tih thu a sawi.

Zirtawpni khan Carrick hian a player-te chu phur taka khel tur leh khelmualah "mei alh ang maia na" (fire) thehchhuak turin a lo phut tawh a. Mahse a tuk Inrinni inkhelah erawh Spurs lakah bul an ṭan ṭha lo hle a, tha thlah deuha an khelh avang leh hmanhmawhna an lantir tawk loh avangin Old Trafford mipuite pawh an lungawi lo hle a nih kha.

Mikhual Tottenham lam hian final third-ah thutlukna dik an siam theih meuh loh bakah, goal zawn pawh thelh ṭhin lo phei se chuan half-time hmain United hian goal an chhuah ngei a rinawm hle. Hemi avang hian first half-ah goal lut lovin an inhnehtawk thei hram a, Carrick pawhin a team-in hetiang zawnga bul an ṭan chu an duh loh ber a nih thu a pha lo a ni.

Mahse, tun season-ah an team theihna leh tha thahruai (intensity) phawrhchhuah chu thil harsa a ni chho mek em tih an zawhna chu Carrick hian a hnawl thung a. Roberto De Zerbi-a naute laka inkhelh a kal chhoh zela a player-ten tha thar an rawn chhuah leh thei chu a fak zawk hial a ni.

Tha thlah taka an khel ṭhin chu an team tan buaina a tling tawh em tih an zawhna chhangin Carrick chuan, "Aih, chutiang thil chu a nih bik ka ring lo," a ti.

"A tawpah chuan chutiang chu a ang viau mai thei a, khatia in sawi pawh kha ka hrethiam e. Mahse i theihna tak tak i thlen loh a, i khelh ṭhat tawk loh hian thil hi a buai hma em em a ni. Tottenham pawh an fakawm, bul an ṭan ṭha takzet a ni.

"A nihna takah chuan, inkhel a kal chhoh zel khan kan theihna tak tak kan hmuchhuak lehin ka hria, chu tak chu a chang chuan a harsa zawk ṭhin. Bul i ṭan ṭhat loh hnu phei chuan khelmuala theihna neih let leh chu a harsa lehzual ṭhin reng a ni. Player-te hi an fakawm hle, first half tawp lam leh a bikin second half-ah khan an rawn insiamṭha thei tlat a ni.

"Khatiang zawng khan bul ṭan kan duh bik hauh lo a, tupawhin khatianga inkhelh ṭan kha an duh lo ang. Player-te tan hun harsa tak a ni a, mahse an bei let a, dinhmun ṭha takah an inhung chho leh thei a. Kawng lehlamah chuan a pawi ber zawk chu hnehna chang hlen tura inkhel kan titawp thei ta lo kha a ni," tiin Carrick chuan a sawi a ni.