Manchester United-in nikum October thla tawp lama Jason Wilcox-a interview an tihchhuah kha vanduai vang emaw thil thleng palh a ni lo hrim hrim.

Khatih lai khan United chuan a zawnin match thum ngawt hnehna an lo chang tawh a, Sunderland, Brighton leh Liverpool te an hneh avangin, Wilcox tan pawh ṭantute (supporters) hmaa rawn inlan leh mipuite biak chu a remchang em em a ni. Carrington-a 'walk and talk' an neih bakah club in-house podcast-ah Wilcox chuan player thar an lakluh te, transfer window-a an ruahmanna te leh manager hlui Ruben Amorim-a hnuaia hmasawnna an neih mekte chu a lo sawi tawh a nih kha.

Khatih laia transfer ruahmanna chungchang sawiin Wilcox chuan, "Kan tih tur kan hria a, team chhunga hmasawnna kan mamawhna hmun kan hre bawk. Top four-ah kan luh a, Champions League khel thei tura kan beih reng theih nan te, Champions League nomawi leh Premier League title kan lak theih nan squad-ah sum kan thehchhuah a ngai a ni. Player dik tak kan lei a ngai. Player theihna nei ṭha, chumi rual pawha pressure hmachhawn thei leh squad chawikang theitu tur an ni tur a ni. Elite talent lak ringawt a tawk lova, mize dik tak nei leh team tana thil thar rawn thlen theitu an ni tur a ni," a lo ti tawh a ni.

Wilcox chuan chhunzawmin, "Kan dinhmunah hian kan lawm hle a, mahse hmasawn kan ngai tih kan hria. Player-te pawh an lungawi ngai dawn lova, Ruben pawh a lawm famkim thei ngai lo ang a, kei pawh ka lawm ngai bawk hek lo ang; kan mize pianpui ve reng a ni. Hmasawnna zawngin kan thlir reng a, United-a thawk tupawhin chu chu an ngaihtuah vek tur a ni a, nitina kan kalpui mek dan pawh a ni," tiin a lo sawi tawh a nih kha.

Match an chak lai chuan hlim taka ṭawng chhuak ṭhin Wilcox hi, tun season bul an ṭan chhiat hnu leh kumin nipui bazara squad thuamchak tawk loh vanga buaina an tawh mekah hian a ngawi tlat thung a ni. Thawhleh zan Champions League match-ah Atletico Madrid lakah an tlawm hnuin, an defender Lisandro Martinez-a thusawi phei chuan Wilcox hi mipuite hmaa rawn insawifiah ngei a ngai a ni tih a tarlang chiang lehzual hle.

Martinez chuan lungawi lo takin, "Kan technical director lakah hian beisei ka nei sang zawk a, dik takin ka sawi a ngai a ni. Player-te pawhin kan theihna zawng zawng kan hlan lehzual tur a ni bawk a, mahse hetiang zan pawimawh hmachhawn tur hian squad chak ṭha tak din a pawimawh em em bawk a ni," tiin a sawi chhuak hial a ni.

Tun dinhmunah hian head coach Michael Carrick chu chanchinbumite zawhna khirh tak tak chhang tura kalsan a ni ta ngawt a. Kumin nipui bazar chhung khan engvangin nge left-back leh striker thar an lakluh loh tih te, tunah player hliam an neih tak nual avanga squad indaih lohna an tawh mekte chu amah chauhvin a chhang a ngai mek a ni. August thlaa Carrick-a'n chanchinbumite a kawm ṭum pawh khan, club dangte anga sum thehchhuah inhuam lo neituten an neih laiin United hian league title an la thei dawn em tih zawhna harsa tak Carrick hian a lo hmachhawn tawh bawk a nih kha.

Europe khawmualpui club dangah chuan sporting director ten recruitment chungchangah mawhphurhna lain, thutlukna an siamte chu mipui hmaah an sawifiah ṭhin a; mahse Britain rama club-te erawh chanchinbumite hmaa manager chauh dintir ṭhin an ni. Recruitment mawhphurtu lian ber Wilcox hian kumin nipui transfer policy an kalpui dan sawisel hlawh em em hi ṭantute hnenah a sawifiah a hun takzet tawh a ni.

Martinez-a ṭawngchhuah hma pawh khan United ṭantute chuan an dinhmun dik tak hi hriat an chak em em tawh a. Hmun mamawh tak tak an neih laia kumin nipui bazarah squad thuamṭhat tawk a ni lo chu mi tin tana hriatthiam har a ni a, Wilcox hian insawifiahna hunṭha nei mah se a la ngawi tlat a, tunah chuan fan-te hnenah thudik a phawrh a hun ta takzet a ni.