Manchester United player Patrick Dorgu chuan head coach Michael Carrick hnenah club-ah hian hmun nghet (fixed position) neih a duh zawk thu a hrilh a, a khelhna nuam tih ber leh a nihna dik tak chu left-back a nih thu a sawi rualin, coach-in a mamawhna hmun apiangah erawh khelh a inhuam reng thu a tarlang tel bawk a ni.

He Denmark international hian hetiang thu hi a sawi chhuak a, tun season chhungin United chuan left-back leh left wing-ah an pawt kual chhen a, hei hian an tlar hnung buaina neih mek pawh a belhchhah hle a ni. Carrick-a'n tlar hma lama khel tura a tih pawhin Dorgu hian a theihna zawng zawng a thehchhuak reng tho a, mahse international break hnu lama a dinhmun turah erawh a ngaihdan a tichiang hle thung.

Danish chanchinbu Tipsbladet nena an inbiaknaah, Dorgu chuan training field-a hma lak zung zung theih nan position pakhata nghet taka awm chu a duh zawk thu a sawifiah a, tunlaiah chuan player tam tak hmun hrang hranga chhawr theih an awm nual tih chu a pawm bawk. Mahse a thil tum bulpui ber chu a tluang hle: khelmual chhungah inlan tam a, inkhelh char char a ni mai.

A sawi zawmnaah, professional football a ṭan tirh aṭangin left-back position-ah a khel ṭan a, chu chu a thiam berna leh a tana inmil ber a nih thu sawiin, United-in tlar hma lama an chhawr theihna ang pawhin a khel thei vek tho tih a tarlang bawk. Kum 2025 January thlaa Lecce aṭanga a luh hnu khan, Dorgu hian hmun nghet a la nei mumal lo hle a ni. Ruben Amorim-a'n left wing-back-ah a chhawr tlangpui a, Amorim-a thlaktu Carrick-a'n mawhphurhna a lak hnuah left winger lamah a sawn chho leh ta a ni.

Season liam ta tawp lam khan tlar hma lamah Dorgu hi a che ṭha hle a, United chu pathumna dinhmun luahtirin Champions League khel turin a tlinpui a nih kha. Mahse tun season-ah erawh left-back leh left wing-a an sawn kual reng avangin a form a tla hniam deuh thung. Hei hi squad chhung inelna vang pawh a ni pakhat a; kum 12 chhung zet club-a lo awm tawh Luke Shaw chu United tana first-choice left-back a la ni reng a, Marcus Rashford pawh Barcelona aṭanga a lo let leh hnuin a che ṭha chho hle a, Matheus Cunha pawhin Dorgu-a hliam vanga a chawlh lai khan hmun a luah ṭha em em bawk a ni.

Dorgu chuan he inelna hi chona lian tak niin a sawi a, mahse Premier League-a che ṭha em em player pathum laka inelna neih chu player ṭha zawk nih theihna hunṭha a nih thu a sawi. Tunah chuan a hunṭha neih te hmang ṭangkai a, Carrick-a lakah rinngam a nih zia pholang tura theih tawp chhuah chu a hna a ni ta a ni.

Tun international break chhung hian Denmark tan Norway an hmachhawn hunah attacking role-ah Dorgu hi a inlan beisei a ni a, hei hian club football a inṭan leh hmain tlar hma lama a theihna phochhuah dan enfiah nan Carrick-a tan data ṭha tak a pe leh dawn a ni. United head coach tan hian zawhna lian tak a la awm reng a: Dorgu hi left-back-ah nghet takin a chhawr zui dawn nge, mual veilam hmun hrang hranga a theihna hi a rinchhan chhunzawm zel dawn tih chu hunin a la hril ang.