Manchester United winger hlui Jadon Sancho chu Old Trafford a chhuahsan hnuah free agent a ni mek a. Khawvel ranking-a 227-naa awm Russian club FK Krasnodar hnenah Sancho-a aiawhtute hian an lo va chhawp a, mahse he Russian club hian lakluh an lo hnawlsak tih hriat a ni.
Kum 26 mi Sancho hian Russian league champion lai Krasnodar zawm hi a chak hle a, mahse inbiakna a thui lo hle a, club nei lovin a la awm chhunzawm reng a ni. Foot Mercato-in Championat thudawn a tarlan danin, Sancho-a'n club thar a zawn mekna lamah hian Krasnodar hi kawngka hawnsak a ni a. Kum 2025-a Russian championship la a, an ram league hmahruaitu ni mek Krasnodar zawm chu Sancho hian a phur hle a, mahse Russian club hian an lo hnawl tak si avangin inbiakna hi a tawp zui ta a ni.
Red Devils nena an contract a zawh hnuah he English winger hi a thlawnin (free transfer) a chhuak a. United-a a awm tawp lam hian Aston Villa-ah loan-in a khel a, mahse a ngheta lakluh a ni zui ta lo a ni. Transfer window khar a nih hnuah pawh free agent a nih avangin club thar a zawm thei reng a, duhthlan tur awmte ngun takin a thlir mek a ni.
Sancho-a hmabak thlirin sawi a tam hle a. Brazil club Palmeiras zawm teuh hle tura sawi ni mah se, a hlawhtling leh ta lo a. Borussia Dortmund-a kir leh tur anga sawi a nih pawhin, manager Niko Kovac-a'n a lo sawi tawh angin engmah thutlukna a awm zui lo. Chu mai bakah, kumin September thla tir lam khan Liverpool midfielder hlui Jonjo Shelvey-a'n Arabian Falcons-a khel tura a sawmna pawh a hlawhtling chuang lo a ni.
Dortmund-a a awm lai khan United hian lakluh tumin hun rei tak chhung an lo thlithlai a, mahse an lakluh hnuah erawh an tan a khel hnem lo hle thung. Khelmuala a chet chhiat bakah training-a a thawhrim tawk loh avangin sawisel a hlawh hle a, Dortmund, Chelsea leh Aston Villa-ah te loan-in a chhuak kual a. Heng club-ah te hian a ngheta awm hlenna hunṭha nei mah se, a chet ṭhat tawk loh avangin tu mahin an la zui duh lo a ni. A bikin Villa-ah phei chuan a thlawna lakluh theih ni mah se, an la zui duh chuang lo a ni.
Khawvel rawlthar man to ber leh beiseiawm ber zinga mi a lo nih tawh hnuah, tunah ranking-a 227-na FK Krasnodar-in an hnawl leh tak hian Sancho-a dinhmun tlakhniam zia a tarlang chiang hle a ni.
