Manchester City chuan Premier League financial regulations (sum leh pai hman dan tur kaihhruaina) an bawhchhiatna thubuai 115 zinga pakhat chiahah thiam an chang a, a dang zawngah thiam loh chantir an ni ta tih hriat a ni.

Hemi chungchanga hremna tur erawh puangzar a la ni lo a, City pawh hian he thutlukna hi an khinglet (appeal) leh ngei tura ngaih a ni bawk. Engpawh nise, he thil thleng hian Premier League chhungah nghawng lian tak a nei mek a ni.

Kum 2009 leh 2018 inkara City-in dan an lo bawhchhiat nia sawi chungchangah hian investigation (endikna) kalpui a nih hnuah thubuai hi siamsak an ni a. He hun chhung hian Sky Blues hi league laili vela tal mai mai ṭhin aṭangin Europe-a club hlauhawm berte zinga miah an rawn inhlangkai a, player ṭha leh manager hmingthang tak tak lakluh nan sum tam tak an hmang a ni. An hlawhtlinna kawngah hian dan tam tak an lo bawhchhia nia puh a ni ta a ni.

He thil thleng hian an elpui lian Manchester United pawh a nghawng tel a ni.

The Athletic-in a tarlan danin, Manchester City-in Premier League financial dan an bawhchhiat avanga Manchester United-in sum leh pai lama an hloh zat chhut chhuak turin United hotute chuan an club chhungrilah endikna (internal assessment) an kalpui mek a ni.

Hriat theih danin, United chauh hi a ni lo, Premier League club dangte pawhin City-a thil tih dik loh hian anmahni sum dinhmun leh hlawhtlinna an chan theihna kawngah engtiang chiahin nge nghawng a neih tih an lo chhui ve reng tawh a ni.

United-in an endikna kalpui mekah hian City chet ṭhat vanga an chhiat ber kumte chu an ngaihtuah bik a ni.

Red Devils-ten Sir Alex Ferguson-a hnuaiah 2011-12 season khan City lakah dramatic takin league title an lo chan tawh a. Khami ṭum khan goal difference-a inthlauhna vang chauhin City hi an champion a nih kha.

Chutah, 2017-18 campaign khan Jose Mourinho-a enkawl United chu Pep Guardiola-a City dawtah pahnihna an ni leh bawk.

He Portuguese manager hlui hian Old Trafford-ah a hun hman laia a hnathawh avang khan Premier League medal a dawn theih mai a la rin thu a lo sawi tawh a ni.

Mourinho-a'n a sawi dan chuan, "Khami season-a league title kha kan la la thei tih ka ring tlat a ni, a chhan chu Man City hi point hlihsakin an hrem maithei a, chutiang a nih chuan keini hi champion kan ni dawn a ni. Chutih hunah chuan club-in bonus min pek bakah medal min hlan a ngai dawn a ni," a ti.

Mourinho-a lo thlen hma season chiah khan United hi pangnahna (5th) niin Champions League khelh theihna hmun pawnah an awm a. City khan goal difference-ah khumin palina (4th) an ni a, Europe inelna sang ber khel turin ticket an lo la zawk a ni. Hetiang thil thleng hrang hrang avang hian United hian sum leh pai tam tak an lo hloh tawh nia ngaiin, an hloh zat hi chhut chhuah an tum mek a ni.