Manchester United chuan tlarhnung thuamṭhat an tumna kawngah RB Leipzig centre-back Castello Lukeba lakluhna tur man zat tarlan chu an thlir mek a. German club hian kum 23 mi defender man atan hian €60 million bakah bonuses an phut nia report a ni.
INEOS-in United tlarhnung thlak danglam vek an tumna ruahmannah hian he rawlthar hi an player ngaihven zual zinga mi a ni a, Leipzig-in a man an chhiar zat hian United ṭantute hnenah beisei tur chiang tak a pe a ni. Tun season chhung hian United tlarhnung laili (centre-back) chungchang sawi a tam hle a, Lukeba-a hming pawh hian ngaihven a hlawh chho reng a ni.
German chanchinbu *Fussball* tarlan dan tarlang sawitu *The Peoples Person* chuan, Leipzig hian a tira pek nghal tur (guaranteed fee) atan €60 million vel an phut a, a hnu lama pek belh tur (add-ons) te nen a vaiin a man hi a aia sangah a chho thei dawn a ni.
He report rintlak zawng hi 10 zinga 6 anga chhut a ni a, tun thleng hian club pahnihte inkarah inbiakna pangngai a la awm lova, player aiawhtute leh palaitute hmang chauhva inbiakna la kalpui a ni rih.
*Fussball* thuchhuah chuan, "Tun dinhmuna an player man phut zat chu €60 million vel leh bonuses a ni a. A vaia a man pumpui chu €60 million leh €65 million inkar a ni thei dawn a ni," tiin a tarlang.
Nipui transfer bazar-ah khan tlarhma lam thuamṭhatna hna an thawk a, tun transfer window-ah hian tlar laili (midfield) thuam chakna hna an thawk leh a, tlarhnung thuamṭhat tak tak erawh nakkum lamah kalpui an rilruk thung. Left-back hmunruak hnawhkhat tur pawh an thlitsawk mek a, Luke Shaw-a thlaktu tur hian Adrien Truffert leh Tyrick Mitchell te chu sawizawm an ni tawh a, hemi rual hian centre-back thar lakluh pawh an tum a ni. Hei hi head coach Michael Carrick-a'n United tlarhnung dinhmun thlira a lo sawi chhuah tawh bawk a ni.
A hma khan Lukeba-a contract-ah hian chhuah theihna man (release clause) £69 million a awm nia sawi a ni a, chuvang chuan tun dinhmuna £56 million vela lakluh theih a nih dawn chuan a hma aiin a tlawm zawk dawn tihna a ni.
Lukeba hi United chauhvin an ngaihven lova, Barcelona, Chelsea leh Arsenal te pawhin an thlithlai reng a, Leipzig pawh hian club hrang hrang aṭangin dawrna an dawn an inbeisei reng a ni.
Tun dinhmunah hian United hian inremna siampui an hnaih hle tihna erawh a la ni lova, inbiakna tak tak pawh a la inṭan lo tih *The Peoples Person* chuan a sawi chiang hle. Hmasawnna awm thei tur chu he player ngaihsantu club-te hian palai hmanga inbiakna mai piah lamah dawrna tak tak an thehlut a nih chauhvin a ni ang a, United hian Leipzig-in Lukeba-a man atana an chhiar zat hi an thehchhuak ngam dawn em tih erawh zawhna lian tak a la ni reng a ni.
