JJ Gabriel-a chhuah dil thu a darh khan sawiseltute chuan, "Manchester United hian naupang theihna nei ṭhate an hip zo tawh lo a ni," tiin an lo ṭawng el nasa hle a nih kha. Mahse, kar hnih chhung leka he puhna hi a dik lo tih fiahin, United chuan Manchester City aṭangin midfielder pahnih leh Liverpool aṭangin forward pakhat an lak thu an nemnghet ta a ni.
Spain rama zin a, Real Madrid leh Barcelona te nena inbiakna lo nei tawh Gabriel-a chân chu channa lian tak ni dawn mah se, October 30, 1937 aṭanga vawiin thlenga matchday squad tinah mahni academy chhuak player telh ziah thei club hian an thil thiam ber: theihna nei ṭha chher chhuah chu an chhunzawm zel dawn a ni.
Kum 15 mi chauh la ni Gabriel-a chanchin hian kar hnih liam ta chhung khan chanchinbu hmai a luah hneh hle a. Hetiang theihna danglam bik nei rawlthar chan chu club tan thil zahthlak deuh mah se, a aiawhtute hnenah Old Trafford-ah hian a hmakhua a êng a ni tih fiah nan hian United hian tih theih dang an nei tam tawh lo a ni. Gabriel hi October ni 6 hian kum 16 a tling ang a, European passport a neih avangin Spain lam hi a pan thei dawn a ni.
Gabriel-a chanchin hian hmun la mah se, Carrington academy-ah chuan hna an chhunzawm mawp mawp a. International break hmain Under-21 team chuan Brentford an hneh a, Premier League 2 match thum an khelh tawhah an la chak fai vek a ni. Under-18 team pawhin bul an ṭan ṭha hle a, hmahruaitu Man City aiin point ruk chauhvin an hniam a ni. Darren Fletcher-a enkawl U18 squad hi Man City aṭanga midfielder Karrim Casim leh David Eze, bakah Liverpool aṭanga forward Isaac Konde te an luh tak avangin a chak lehzual dawn a ni.
Heng player thumte lakluh hi thla eng emaw zat chhung an lo buaipui tawh a ni a. Eze-a lakluh thu hi Inrinni zingah an puangzar dawn a, Konde-a transfer pawh Premier League lamin an pawmpui fel tawh bawk a ni. An elpui lian aṭanga hetianga rawlthar an inlak chhawk hi tun hnaiah thil thleng ngun tak a ni chho a. Brexit hma kha chuan European passport nei kum 16 tlingte chu lak theih a nih avangin club lian parukte hian in-chhuhsak lovin Europe khawmualpui lam an melh ṭhin a; Garnacho leh Alvaro Fernandez pawh Spain aṭanga an lakluh an ni. Mahse Brexit hnuah ram pawn player kum 18 tlin hma lak theih a nih tawh loh avangin UK chhungah club-te an in-hai buai ta zawk a ni.
United hian player naupangte hnenah first team thlen theihna kawngka ṭha an hawnsak theih thu an hrilh a. Fulham laka an inkhelh ṭum khan academy chhuak Kobbie Mainoo leh Marcus Rashford te chuan bul an ṭan a, Brighton lakah Shea Lacey chuan goal a khung bawk. Chu bakah season ṭha tak a hman hnuin Noah Ajayi chuan professional contract a ziak fel bawk a ni.
Tun hnaiah United hian academy player thar an puanchhuah dan an ti-ropui zual a. Old Trafford dressing room leh pitch-a thlalak bakah, minute khat vela sei behind-the-scenes video te an tichhuak ṭhin. Cassim-a hnenah an club blazer hlan a nih lai te pawh pholan a ni a. He blazer-ah hian Latin ṭawngin 'Concilio et Labore' (Finna leh Thawhrimna) tih inziak kalhin, Manchester khawpui paltlangtu luipui pathum (Irwell, Irk leh Medlock) entirna thil rin pathum a chuang bawk a ni.
