Manchester United chak loh match official-ten an duh lo nia sawitu Fulham manager Alvaro Arbeloa chu Football Association (FA) chuan dan bawhchhiatna thubuai (misconduct) an siamsak ta.

Fulham boss hian international break hmaa Craven Cottage-a an inkhelh khan, Manchester United chu referee-ten an ṭan bik niin a ngai tlat a. Kar kalta lawka Manchester derby inkhelah khan Enzo Fernandez chu offside dinhmuna a awm laiin Erling Haaland-a goal an lo pawmsak tawh a, he thil thleng avang hian United chu duhsak an hlawh zui phah niin a ngai a ni.

A thinrim em em Arbeloa hian thutlukna zawng zawng chu United lam ṭan zawnga lak niin a sawi a. Michael Carrick-a naute tana minute 89-naa Matheus Cunha-a'n an siphurh a rawn sut hma second 35 lekah khan, Harry Maguire-a laka Cesar Palacios-a'n foul a neih avanga free kick an pe chu a lawm lo hle a ni. Real Madrid coach hlui hian he foul pek hi thutlukna nep lutuk leh nawi lutuk niin a sawi a, Manchester City laka an inkhelh ṭuma United laka referee-te thutlukna siam sual phuhruk nana pek niin a ngai a ni.

Match zawha a thusawi dan chu mawi lo leh thiang lo a nih avangin FA chuan Arbeloa hi an charge ta nge nge a.

FA chuan thuchhuah siamin, "Pathianni, September 20-a Fulham leh Manchester United inkhelh zawha a thusawi avangin Alvaro Arbeloa lakah hian misconduct thubuai siam a ni. Fulham manager hian match zawha interview a neihnaah match official-te chu mi ṭan bik nei emaw, an rinawmna ringhlel zawng emaw a ṭawngchhuahna neiin, nungchang mawilo tak a lantir niin puh a ni. Alvaro Arbeloa hian he thubuai chhanglet tur hian Ningani, October 1 thleng hun a nei," tiin an nemnghet a ni.

Match zawh hnu lawka Sky Sports hnena Arbeloa-a thusawi hian buaina lian zawk a thlen zui a. Fulham boss lungawi lo tak chuan, "An tan foul an pe vek a ni ber e. Goal an khung hma khan Maguire-a laka foul an pek kha in hmu thei ang, ani chu kilo 100 zeta rit a ni. Thutlukna tinreng mai kha an lam ṭan vek a ni.

"Ka hre sa lawk vek a ni. Man City nena an inkhelh hnu aṭang khan he hmunah hian Manchester United hi an chak lohtir dawn lo tih ka hre sa vek. Point khat aia tam hmuh kan phu a ni. Kan hnaih tawh em em a, mahse kan vanduai leh ta hlauh a ni. He team lian lakah hian a harsa dawn tih kan hre sa a. Chu bakah kar kaltaa thil thleng kha kan hre vek bawk. He match chhung zawnga referee-ten an tih dan kan hmu vek a, inkhel harsa tak a ni. Kan vanduai hle bawk a ni," tiin a sawi a nih kha.

Hemi hnu hian press conference-ah erawh Arbeloa chuan a thinurna chu thunun tumin a insawifiah deuh a. "Ka English a ṭha tawk lo a ni. Ka insawifiah ṭha tawk lo a ni maithei a, referee-te chungchang engmah sawi loh hi ka duh zawk a, a chhan chu thil hi hriat lawk a har si a.

"I sawi miah loh tur thil i sawi palh a nih chuan inbengdaih a, ka team-te khelh dan leh match lehah chauh rilru pek hi a ṭha ber a ni. Ka lawm fahran lo khawp mai. Ka sawi tawh ang khan, ka rilru ka pek a, kan hmasawnna tur thilte atana tha sen hi ka tih tur a ni. Maguire chu mi lian tak a ni a, foul a lo ni lo mai thei bawk. Mahse a pawi lo ve. Ka sawi tawh ang khan inkhelh enfiah a, player-te leh game khelh dan phung zirchian a, chak nana hma lak hi a ṭha ber a ni," a ti leh hnuhnawh bawk a ni.