Manchester United forward Amad chuan hun rei lote hnuah khelmuala a kir leh theih tawh tur thu a tarlang chho a, hei hi head coach Michael Carrick-a tan chuan chanchin lawmawm tak a ni. Kum 24 mi, Ivory Coast international hian hliam a tawrh avangin tun season chhungin United tan match khat mah a la inlan lo a ni.
Premier League season thar an ṭan hma chiah, Hull City an hmachhawn dawn nia a inhliam avangin inelna hrang hrangah match 7 ngawt a hmaih tawh a ni. Kumin nipui laia World Cup an khelh ṭum khan Amad hian Ivory Coast match khelh zawng zawngah bul a ṭan vek a, Ecuador an hneh ṭum leh round of 32-a Norway laka an tlawm ṭum khan goal a khung bawk. World Cup a khelh zawha chawlh pek belh a nih hnuin United-ah a kir a, pre-season match-ah te pawh a lo inlan hman a ni.
Instagram story-ah Amad hian season liam taa Old Trafford-a a thlalak chu egg timer (hun chhiarna) leh hmel lungawi loh hmel tak emoji dah telin a post a, hei hian nghah a ngai rei tawh dawn lo tih a entir a ni. International break an neih mek avangin Premier League a chhunzawm leh hma hian dam ṭhat hman nan hun a nei zui bawk ang. United hian October ni 10, Inrinni tlai dar 5:30 (BST)-ah mahni mual Old Trafford-ah Tottenham Hotspur an mikhual dawn a ni.
International break hma khan Michael Carrick chuan he winger chungchang hi sawiin, "Amad hi, kan kir leh hun meuh chuan team nen training a neih theih beisei ila, chu chu thil lawmawm tak a ni ang," tiin a lo sawi tawh a ni.
Season liam ta khan Amad hian Premier League-ah vawi 32 inlanin goal 2 a khung a, assist vawi 4 a nei bawk a ni. A rawn kir leh theih mai dawn hi Carrick tan a pawimawh hle, a chhan chu international break chhung hian United squad-ah hliam vangin harsatna an tawk nual a ni.
Thawhleh zan khan Morocco-in Lesotho an hneh ṭum khan full-back Noussair Mazraoui chu lakchhuah a ngai a. Pathiannia Denmark-in Wales an hneh ṭumin Patrick Dorgu pawh a hliam avangin mual a chhuahsan a ngai bawk. Marcus Rashford, Kobbie Mainoo leh Benjamin Sesko te pawh international match chhuahsanin break hma khan an inhnukdawk tawh a ni.
An captain Bruno Fernandes pawhin Pathiannia Norway laka Portugal hnehna chan ṭum kha a hmaih a, mahse Ningania Denmark an tum hmain training a zawm leh tawh avangin inlan theih tura beisei a ni thung.
