Manchester United manager hlui Louis van Gaal chuan Manchester City-in dan bawhchhiaa sum an hman ṭhinna avangin kum 2016 khan Old Trafford-ah a hna a chan phah niin a sawi chhuak ta.

Kum 2016 May thla khan Manchester City chuan goal difference hmangin Manchester United chu an khum a, Champions League khel thei dinhmun palina an hauhsak a nih kha. Hei hi United thuneitute'n Van Gaal an ban tak chhan lian ber nia ngaih a ni. Dutchman hian a match hnuhnung berah FA Cup final-ah Crystal Palace hnehin nomawi a chawipui a, mahse darkar 24 hnu lekah ban niin Jose Mourinho-a'n a thlak zui ta a ni.

Independent commission chuan Manchester City hi Premier League-in sum hman dan chungchanga dan a siamte bawhchhiaah an puang a, kum 2009 leh 2018 inkar khan £900m chuang zet chu a ruka sum lakluh hmanga hlawkna lo tel ṭhin an ni tih an nemnghet a ni. He thil avang hian Van Gaal chuan khang hun laia a dinhmun tur lo inher danglam theih dan chu a ngaihtuah let lo thei lo a ni.

The Athletic hnena email hmanga a thil sawiah Van Gaal chuan, "Kha mi ṭum khan, kum 2016-a Champions League kan khel pha ta lo kha Manchester United aṭanga min ban zui chhan bulpui ber leh, a nghawng chhe zawng zawng leh ka tuar phahna zawng zawng bul a nih ngei ka ring a ni," tiin a sawi.

Van Gaal chuan sawi chhunzawmin, "Tunah chuan thil lo thleng tawh hnu ka her danglam thei tawh lo. English Football Association (FA) pawhin chu chu an ti thei bik lo ang," a ti bawk. City hremna an pek tur chungchang an zawhna chu chhangin, "A tawpah chuan, chu chu roreltu (judge) thutlukna siam tur a ni ang," tiin a sawi.

City hian October 1 khan zualkona (appeal) an thehlut a, phat rual loh finfiahna nghet tak an kawl thu an sawi a, he appeal thutlukna hi nghah mek a ni.

Van Gaal chauh hi Premier League manager hlui lungawi lo a ni lo. Stoke City manager hlui Tony Pulis pawhin kum 2011 FA Cup final-a Manchester City an hneh loh ṭum khan bum an nih ve thu tun thla tir lam khan a lo sawi chhuak tawh bawk a ni.

Pulis chuan, "Kei pawhin khatiang chiah kha ka ngaihtuah a ni. Manchester City hian zualkona an thehluh dawn avangin he thubuai hi la tawp mai dawn lo mah se, he thutlukna leh dinhmun zawng zawng hian ka rilru a tina takzet a ni," tiin a sawi.

Sawi zawmin Pulis chuan, "Manchester City hian phone hmangin keimah emaw ka club emaw min rawn bia ang a, kum 2011 FA Cup nomawi leh an player-te medal dawn kha min rawn pe let ang tih beiseina ka nei lo. Nomawi dang pawh pekkir a nih ka ring chuang lo. Point paihsak leh hremna sum tam tham tak chawitir chu a thleng thei ber tura ngaih a ni a. Mahse bum ka nihna rilru erawh a la bo chuang lo," a ti bawk.

Thla liam taa thuchhuah an siamah khan City chairman Khaldoon Al Mubarak chuan, "Mi ṭhenkhat chuan thutlukna an siam hmanhmawh hle a, kan chhehvelah thawm a ri ring hle bawk a, mahse engmah a la danglam lo. Hma thil harsa tak tak kan lo hmachhawn dun tawh ṭhin a, kan paltlang tawh ṭhin a ni. Kan club hmasawnna tithuanawp duh tam tak an la awm a, mahse chu hun remchang chu kan pe dawn lo a ni," tiin an dinhmun a lo tarlang tawh thung a ni.