Manchester United aṭanga Turkish club Trabzonspor lama loan-a chhuak goalkeeper Andre Onana chuan khelmualah tihsual lian tak a nei nawn leh ta. Europa Conference League inkhelah, Finnish club KuPS lakah Onana hian corner aṭanga pet luh chu a lo dang zo lova, mualneitute lakah goal a chhuah phah a ni.
He thil thleng hian Manchester United tana a khelh laia a chetsual nasat ber ṭumte zinga mi a ti hrechhuak thar leh hle. Kum 2024 Boxing Day-a Wolves nena an inhmachhawn ṭum khan, Wolves striker Matheus Cunha-a corner pet chu Onana-a lu chung chiah aṭangin net-ah a lut a, khami ṭum khan United chu 1-0 in an tlawm phah a nih kha. Tunah he Cameroonian goalkeeper hian chutiang thil chiah chu KuPS lakah a ti nawn leh ta a ni.
Mahse he inkhelah hian Onana tan vanneihna a awm ve hlauh thung a, a chhan chu a tihsual lian tak hian an match a tichhe zo ta lo hlauh a ni. Trabzonspor chuan KuPS hi 4-2 in an hneh tho a, Onana pawh hian a tihsual rul let turin penalty chhuih luh tur ṭha takin a lo dansak nghe nghe bawk a ni.
He hnehna an chan hnu hian Turkish club hi an tualchhung league lamah pawh an dinhmun a ṭha hle a, Turkish Super Lig hmahruaitu Galatasaray chu point thum chiahin an phak lo mek a ni.
Nipui transfer bazar lai khan Trabzonspor hian Onana hi a ngheta lei (permanent transfer) an duh loh avangin loan hmang chauhin an lalut a. Manchester United lam pawh hian pre-season training zawm tura Carrington-a koh let a, club-a a cham zui hlen hlauh ai chuan rang taka loan-a chhuahtir mai chu an thlang ta zawk a nih kha.
Kum 2023 khan David de Gea thlaktu atan manager Erik ten Hag-a ngenna angin United chuan £47million lai sengin Inter Milan aṭangin Onana hi an lalut a. Mahse Old Trafford-ah hian beisei a phak lo hle a, tihsual lian tak tak nei zutin Champions League group stage aṭanga United tlak phahna chhan lian tak a lo ni tawh a ni.
Onana hian Manchester United-ah hian kum 2028 thleng daih contract a la nei a, mahse hetianga tihsual lian a neih nawn leh zel avang hian nakkum nipui bazara a ngheta hralh chhuah tumna kawngah United tan harsatna a siamsak zual ngei a rinawm a ni.
