Liverpool legend Steven Gerrard chuan rawlthar JJ Gabriel chu a vaukhân a, Manchester United-a a hmachhawn mek harsatnate hi Real Madrid-ah Jose Mourinho-a hnuaiah pawh a hmachhawn dawn tho tih a hrilh.

Kum 15 mi Gabriel hian La Liga club lian Real Madrid-in an ngaihven mek avangin United chhuahsan a duh thu club hotute a lo hrilh tawh a, kar liam ta laia first-team debut siam ṭep tawh a nih laiin he thutlukna hi a siam a ni.

He rawlthar hian Old Trafford-a a registration tihtawp a duh thu a sawi thut a, hemi hnu hian United team hrang hrangah a la inlan leh ta miah lo a ni. Brighton laka an tlawm hnu khan United boss Michael Carrick chuan Gabriel-a chungchangah hian fimkhur a ngaih thu a lo sawi tawh a.

Carrick chuan, "JJ-a hi naupang a la nih avangin a hriselna leh enkawlna kawng hi kan ngaihtuah hmasak ber tur a ni. Tlangval naupang tak a la ni a. Dinhmun chu a nihna ang hi a ni mai a, mahse he thilah hian mipuite hriat hlawh lutuk tur lakah kan fimkhur a ngai a ni," tiin a lo sawi tawh.

Gerrard pawhin Carrick-a ngaihdan hi thlawpin, Gabriel-a career hi venhim a ngaih thu a sawi a. TNT Sports hnena a sawinaah Gerrard chuan, "He thilah chauh pawh hian a ni lo. Football khawvelah hian naupangte hmanhmawh taka nawr luih leh an career tihchhiat theihna tur thil hian min tiṭhaih hle a ni.

"JJ Gabriel-a dinhmun bik chanchin leh a hnunglam thilte hi chipchiar takin hre lo mah ila, khawvela club lian ber pakhatah a awm mek a. Player ṭha tak tak chher chhuah kawngah chanchin ropui tak an lo nei tawh ṭhin a ni.

"Manchester United chhungrilah hian mi thiam tak tak an awm a, mahse ka tana thil lian ber chu, a hun takah leh a inpeih tawh nia an hriat hunah amah venhim duh tur English coach [Michael Carrick] leh English assistant manager [Steve Holland] te an awm a... a inpeih tawh nia an hriat hunah chuan an khelhtir ngei ngei ang.

"He thilah chauh pawh hian a ni lo, football khawvel pumah hian hetiang theihna nei ṭha rawltharte hian nu leh pa, agent leh pawn lam thununna an nei ṭhin a, chung chuan hmanhmawh takin an nawr lui ṭhin a, hei hian naupang career a tichhia ṭhin a ni," tiin a sawi.

Gerrard chuan sawi chhunzawm zelin, "Hei hian pressure lian tak a thlen dawn a, tin club dangin he dinhmun hi an rawn thlir a nih chuan, 'he naupang hi theihna nei ṭha tak chu a ni ngei a, mahse a vela buaina leh thawm awmte hi kan duh dawn em ni?' tiin an inngaihtuah ang.

"Entirnan, Real Madrid-a Jose Mourinho hi han hmang ta ila. Real Madrid-ah chuan kal pawh nise, Jose Mourinho hian he naupang hi a khelhtir nghal ngawt dawn em ni? Nawr luih a ni dawn em ni? Manager lian tak takte mizia chu in hriat kha, team tana chhawr ṭangkai theih tura an inpeih hunah chauh naupangte hi an khelhtir ṭhin.

"Ka ngaihdan chuan naupang hriselna leh enkawlna hi an ngaihtuah hmasak a ngai a, Manchester United chuan chu chu an pe thei a, chutiang lo tih tawh ṭhinna chanchin pawh an nei bawk. Hmanhmawh chhan tur leh phili vak chhan tur ka hmu lo a ni.

"Chhung lamah eng thutiam nge awm a, eng nge an sawi ka hre lo, mahse pawn lam aṭanga thlirin tu emawin a nawr luiin a hmanhmawh pui hle tih a hriat a. Hei hian he naupang hi eng kawng zawng mahin a ṭanpui dawn lo a ni.

"Sawi tawh angin, Manchester United elpui lian tak ka ni a, mahse hla deuh aṭangin Manchester United hi ka thlir ṭhin a, coach ṭha tak tak leh mi ṭha tak tak an kawl a ni. Michael Carrick hi ṭha takin ka hria a, he naupang hi inpeih nise chuan a khelhtir ngei ang," tiin a sawi zui bawk.

UEFA Youth League-a Sabah FK laka hat-trick a khung hnu aṭang khan Gabriel hi Carrington-ah a la inlan leh miah lo a ni.