Manchester United chuan kumin nipui transfer bazar khar dawn hnaih khan Manchester City left-back Rayan Ait-Nouri lakluh tumin beihpui an thlak thut a, mahse he deal hi an tifel thei ta lo a ni. Red Devils hian an left-back Luke Shaw-a contract neih laiah thla 12 chiah hmabak a neih tawh avangin, tlar hnung veilam thuam chak nan player thar lakluh an duh hle a ni.
Nipui bazar inṭan tirh lamah chuan United hian midfield thuam chak lamah an theihna zawng zawng an sawrbing hmasa phawt a, bazar tawp dawn lamah left-back lakluh tumin an che chhuak leh ta chauh a ni. United hian Newcastle United left-back Lewis Hall chu an lak luh tum ber zinga mi atan an lo thlang hmasa a, mahse Magpies lamin chhuah an phal lo thung. Hemi hnu hian Barcelona defender Alejandro Balde pawh an lo ngaihven leh tawh bawk a, mahse he indawrnaah pawh hian beiseina a beidawnthlak leh hnuah, transfer window khar a nih hmain Ait-Nouri lamah an mit an len ta a ni.
Ait-Nouri hi kum 2020 khan French club Angers aṭangin loan-in Wolverhampton Wanderers a zawm a. Molineux-ah hian a chet ṭhat nghal em avangin a kum lehah a nghetin an lalut zui ta a ni. Midlands club-ah hian season li chhung zet a khelh hnuah Premier League-a a khelhna hmun bika player ṭha berte zinga mi a rawn ni chho ta a. Nipui liam ta khan Manchester City chuan an lalut ta a, mahse kum 25 mi Algerian international hian Etihad Stadium-ah beisei angin hmun a la chang tam tawk lo thung.
Season liam ta khan inelna hrang hrangah Ait-Nouri hian match 28 chauh a khel a, chung zingah chuan vawi 20 bul ṭanin assist vawi 5 a nei a ni. Premier League-ah vawi 17 inlanin minute 976 chhung a khel a, Champions League-ah vawi 6, EFL Cup-ah vawi 3 leh FA Cup-ah vawi 2 a khel bawk. Khelmuala hun a chan tlem chu remchangah lain United chuan lakluh theih an inbeisei a, mahse an beihna chuan rahṭha a chhuah ta lo a ni.
Football Insider-in a tarlan danin, City hian Ait-Nouri chu Old Trafford pana chhuak turin phalna pek an tum lo bur a ni. Chanchinbu thudawnna chuan, "Manchester City lamin an elpui lian club zawm turin an player hi chhuah an phal miah loh avangin, Deadline Day-ah khan Man United hian Rayan Ait-Nouri hi lak theihna hunṭha an nei lo hrim hrim a ni," tiin a tarlang.
He report hian Citizens lam chuan January transfer window-ah pawh he Algerian hi chhuahtir an tum lo tih a sawi bawk a: "City chuan January window hnu lam thleng pawha Ait-Nouri hian club-a cham chhunzawm zel turin an duh a, manager Enzo Maresca pawhin tun season chhungin inelna hrang hrangah chhawr ṭangkai a tum a ni," tiin a tarlang bawk.
Transfer Insider podcast-a a inlan tumin journalist Pete O'Rourke pawhin sawi belhin, "Deadline day khan Manchester United nen sawizawmna a awm nual a, mahse Manchester City hian a chhuah an phal dawn loh bakah, an elpui lian Manchester United laka hralh phei chu an rilruk ngai loh avangin he inremna hi a puitling ngai dawn lo hrim hrim a ni," a ti. "Tun season-ah hian left-back-ah an mamawh dawn chiang hle a, chumi hmunah chuan Nico O'Reilly an lo chhawr tawh ṭhin rualin midfield-ah pawh a khel thei a, tin, central defence-a khelh nuam ti zawk Gvardiol an kawl bawk a ni," tiin a sawi.
Ait-Nouri hi United tan chuan Shaw-a thlaktu tur atan ruahmanna ṭha tak ni thei tur a ni a. Mahse City lamin engtik thlahmaha United pana an chhuahtir a rinawm loh miau avangin, INEOS chuan kumin leh nakin zel atan player dang melh mai chu an tihtur a ni ta a ni.
