Celtic manager hna nena sawizawm a nih mek laiin, Sky Sports leh ITV pundit Roy Keane chuan manager hna chelh leha football tualzawla kir leh chu a inhuam thu a sawi chhuak ta.

Scottish champion Celtic manager Martin O'Neill-a hmabak chungchang a chian loh lai takin Keane-a chanchin hian ngaihven a hlawh chho hle a. O'Neill hian tun international break chhung hian a dinhmun a inngaihtuah nawn tur thu a lo sawi tawh a ni.

Ni sarih chhung leka an vawi thum tlawmna tawk mekin, Celtic hi an hmelma lian Rangers lakah Premier Sports Cup-ah an tlawm a, Europa League-ah mahni mualah Ferencvaros an hneh loh hnuah Rangers lakah bawk league match-ah 1-0 in an tlawm leh a ni. Celtic Park-a 1-0 a an tlawm ṭum hian Manchester United captain hlui Keane hi khelmuala a ṭhu lai hmuh a nih avangin, O'Neill-a thlaktu a ni mai dawn em tih fan-te zingah sawi a tam phah hle a ni.

Mahse Celtic chief executive Michael Nicholson chuan kum 74 mi O'Neill hi an thlawp tlat thu a tarlang a, chuvangin thutlukna tawp chu O'Neill-a kutah a innghat dawn a ni. Keane leh O'Neill hi Ireland national team leh Nottingham Forest an enkawl lai khan an lo thawk dun tawh ṭhin a ni.

Keane hi Ipswich Town a chhuahsan aṭang khan kum 15 chhung zet chu manager hna thawk lovin a awm tawh a, a hmain Sunderland-ah bul ṭan ṭhain hlawhtlinna a lo chang tawh a nih kha.

Inrinni khan Sky Sports Premier League A-Z-ah Micah Richards nena an inbiaknaah, Keane chuan manager hnaa kir leh theihna kawng a la inhawng reng tih tarlangin: "A mak khawp mai, kar tawpa inkhel hrang hrang ka thlir hian, team ṭhenkhat ka hmu a, 'Sawlai hmuna va lutin hna va thawk ta ila ka ti thei ngei ang' tih rilru ka put chang a awm ṭhin," tiin a sawi.

"Mahse kar tawpah chauh a ni tlangpui. Kar laiah emaw, Thawhṭan zinga cafe pakhata artui ei a chanchinbu chhiara ka awm lai chuan a ni lo. Manager-te'n kawngpui hrula motor khalh kual paha rilru hah taka an awm ṭhin te ka ngaihtuah a. Mahse ka chhungrilah hian meichher mit lo a la awm reng a ni. Tu emawin min rawn bia se, 'eng nge thleng dawn' tih tunge hria? Mahse a thlen theihna chance erawh a tlem hle," a ti bawk.

Richards-a'n Keane hnenah manager rilru a la pu reng tih a sawi chu pawmin, Keane chuan: "Ni e, studio aṭanga inkhel kan thlir lai pawh hian manager thlir dan aṭangin kan en ṭhin reng a ni. Mahse a taka va luh a, club kalhmang leh a buaithlakna zawng zawng va hmachhawn chu a danglam leh thung a ni," a ti.

United legend hian tun hnai kum chhung pawh khan manager hna chelh theihna hunṭha a lo hnar tawh ṭhin thu sawiin: "Hetia ṭhut a, 'awle' tih vel mai chu a nuam alawm. Mahse a tak takah chuan contract leh staff chungchang buaina a awm ṭhin a, 'hetiang hi ka ti duh tak tak em?' tih a ngai ṭhin a. Chuvangin 'i thiltih lai hi vuan zawk mai rawh' tih rilru put a awl ṭhin," tiin a sawifiah bawk.

Kum 2006 khan Keane hian Celtic Park-ah a football khelh hun a lo titawp tawh a. Kum 2014 khan Ronny Deila an ruat hmain Celtic manager hna hi a lo hnar tawh bawk a, khatih lai khan club thuneitu Dermot Desmond chuan a duh phawt chuan he hna hi a ta a nih thu a lo hrilh tawh thu Keane hian a sawi lang bawk a ni.