Old Trafford-a Manchester derby inkhelah, minute 70 dawn mi 10-a khel Manchester City lakah Manchester United chu harsa takin tlawm mah se, United head coach Michael Carrick chuan a player-te chu a sawisel duh lo.

United hian mual chhungah mihring tam zawk nihna hun rei tak chhung nei mah se, hun pek belh (injury time) minute tawp thleng khan chance chiang kuang an insiam thei meuh lo a, goal lam pana vawi 16 an pet zinga 10 lai chu penalty box pawn aṭanga an pet a ni hial. Hei hi Carrick-a enkawlna hnuaiah United-in Old Trafford-a goal an khung theih loh vawikhatna a ni a, tun season Premier League-a bul an ṭan ṭhat tawk lohna chu a chhunzawm zel a ni.

Team-in tlarhma lamah kawng an sial theih meuh loh lai pawhin Carrick hian minute 67-na thleng striker Benjamin Sesko a luhtir duh lo a. Tlarhmaa theihna an phochhuah tawk loh chung pawhin, goal an khung theih tak loh avanga a player-te dem ngawt chu a tum loh thu he English coach hian a tarlang.

Penalty box pawn aṭanga hla tak tak aṭanga ball an pet nual chungchang zawhna chhangin Carrick chuan, "Kha kha chu chance siam tumna kawng pakhat ve mai a ni. Ka sawi tawh ang khan player-te hi ka sawisel lutuk thei lo a, sawisel pawh ka tum lo bawk; a chhan chu hetiang kawngah hian thil ṭha tam tak kan lo ti tawh ṭhin a ni. Mahse vawiin chu kan mamawh ang kan hmu zo ta lo a ni e," tiin a sawi.

Carrick chuan sawi zawmin, "Chance siam leh goal khung kawngah chuan, helai muala kan chak tawhna zawng zawngah khan goal hnih aia tlem lo kan khung ziah a, match khat kan hloh tawhah pawh goal kan khung tho a ni. Chuvangin goal kan khung loh vawikhatna a ni a, chutiang dinhmun aṭang chuan thlir thiam a ngai bawk a ni. Engpawh nise, eng emaw chang chuan goal khung theih loh match a thleng ve bawk ṭhin a; player-te hi ka sawisel chiam thei lo, goal khung thei leh chance siam thei player ṭha tak tak kan nei a ni. Match hranpa bik anga kan thlir chuan, team lakah hian beisei a sang ngei mai a, goal khung pawh kan duh takzet a, mahse vawiin chu kan ti thei ta lo a ni," a ti.

Bruno Fernandes a tlawh avanga City forward Phil Foden hnawhchhuah a nih hnuah United-in huamhauh takin mual an thunun tawk lo nia an ngaihdan chu Carrick chuan a hnawl thung.

"Hma kan la ṭha tawk niin ka hria, a bikin second half-ah khan hma kan la viau a ni. Second half an rawn luh a goal an khung hma khan keimahni zawk kan ṭha zawk bawk. First half chawhnu lam ai khan kan khel ṭha zawk thei tih ka hria a, half-time hnuah boruak ṭha zawk kan nei a, goal ban pawh kan pet per a, khami hun lai khan kan duh dan takin inkhel kha a kal chho mek a ni.

"Mahse an goal khung khan nghawng lian tak a nei zui ta a, inkhel pawh kha a aia ṭha zawkin kan khar thei ngei ang. Tlarhma lamah pawh a aia fing leh theihna nei zawkin kan che thei a, a ṭha zawka inkhel khar kha kan ti thei chiang a ni," tiin Carrick chuan a tlip a ni.