Manchester United chuan head coach Michael Carrick-a hnuaiah beisei an phak loh chhunzawm zelin, Thawhleh zan khan Champions League inkhelah Atletico Madrid lakah 2-0 in an tlawm leh ta. He inkhela an tlawm zui hian Old Trafford chhungrila buaina awmsa chu a chawk tho zual hle a ni.

Carrick-a'n club a enkawl pumhlum ṭanna season hmasa berah hian United chu an buai chho hle a. Tun season chhung zawng hian vawi hnih chiah hnehna an la chang a—chungte chu Premier League-a Ipswich Town 5-2 a an hneh leh Champions League-a Sabah FK 4-0 a an sawp ṭum chauh kha a ni.

Champions League match an khelh vawi hnihnaah hian Spanish club lian Atletico Madrid lakah United hian inkhelh thununna an nei lo hle. Riyadh Air Metropolitano mualah mualneitu tan minute khat pawh a la ral hmain Pablo Barrios chuan hma a hruaipui nghal a. Minute 74-naah defender Leny Yoro hnawhchhuah (red card) a nih tak phei chuan United dinhmun a chhe zual a, hemi hnu minute nga lekah Ademola Lookman chuan goal thun belhin Atletico chu 2-0 in hnehna a chanpui ta a ni.

He tlawmna rapthlak tak hnu hian Argentine defender Lisandro Martinez chuan club board leh nipui bazara player an lak dan chungchangah nasa takin a dem thu a sawichhuak a. Tun dinhmuna an squad neih lai chu Champions League khel phu a nih loh thu a sawi lang bawk. Amazon Prime nena inkawmna an neihah Martinez hian an director of football Jason Wilcox chu kawkin, manager Michael Carrick erawh a thlawp tlat thung.

Martinez chuan a thusawiah, "Heta lo kal a, ka team-te'n result ropui tak hmuh tura theihtawp chhuah an tum miah lo ka hmu hi a thinrimthlakin a beidawnthlak takzet a ni," tiin khelmuala an thiante inpekna chu a sawisel a ni.

Sky Sports tarlan danin, Martinez-a ṭawngchhuah dan hian United dressing room chhungril a tibuai ta hle mai. Madrid aṭanga thlawhna hmanga England an pan kir leh laiin, an team-mate pakhat chuan Martinez hi hmachhawnin he inkawmna chungchangah hian a zilh niin a tarlang a. Squad member dang eng emaw zat pawhin Argentine star-in mipuite hmaa team a sawisel chiam chu an ngaithei lo hle niin an sawi bawk.

Kawng lehlamah, United nena inkhelh hnua a thu sawi avangin Fulham manager Alvaro Arbeloa pawh hrem a tawk ve bawk. September 20 khan Craven Cottage-ah United leh Fulham te chu 1-1 in an lo inhnehtawk tawh a. Hemi ṭum hian minute 63-naah Martinez-a own goal hmangin Fulham hian hma an hruai a, mahse second-half stoppage time tawp lamah Matheus Cunha-a ball pet Bernd Leno-a man theih loha a luh tak avangin an inpe ṭha leh ta a nih kha.

Chu match zawhah chuan Arbeloa chu referee-te thutlukna siamah a lungawi lo hle a. Spanish manager chuan, "Foul engkim mai kha an tan a ni vek. Thutlukna tinreng an tan zelin, Man City laka buaina chhuah hnu aṭang khan helai hmuna Manchester United hi tlawm an phal dawn lo tih ka hre sa vek a ni," tiin a lo sawi a nih kha.

He a ṭawngkam na tak avang hian FA chuan Arbeloa chu £25,000 an chawitir bakah official warning an pe zui a. Hemi chungchanga thutlukna siamtute chuan Arbeloa-a thusawi hian inkhelh chhung zawnga match official-te'n United an duhsak tih a sawina mai bakah, match danga tihsual rulhlet tumna rilru an pu nia puhna a kawk tel tih an tarlang a ni.