Manchester United manager hlui Ruben Amorim chuan nipui laia Massimiliano Allegri thlaka AC Milan a enkawl ṭan hnuah, bul a ṭan fuh thei meuh lo a ni. Italian club lian hi Serie A table-ah pangana (5-na) dinhmunah an awm mek a, league match ruk an khelh tawh aṭangin vawi thum chiah hnehna an la chang a ni.

League-ah tlawm la nei lo mah se, Milan hian vawi thum lai draw an neih tawh avangin point pawimawh an hloh nual a. Sassuolo nen 1-1 a an inhnehtawkna chuan club neitute rilru a tibuai ta hle a ni. He inkhelah hian Milan neitu Gerry Cardinale pawh a lungawi lo hle tih hmuh theihin a lang a ni.

France international Adrien Rabiot chuan second half-ah Milan tan hma a hruaipui a, mahse minute tlemte hnuah Sassuolo chuan an siphurh an rawn rul leh nghal a. Italy chanchinbu report-te tarlan danin, Milan-in siphurh an neih hnu leh chakna goal an zawn chhuah theih tak loh avang khan Cardinale chu beidawng takin Mapei Stadium aṭangin a chhuak a ni. Tun kar chhung khan Cardinale hi lukhum, "Make Milan Great Again" tih inziahna khumin hmuh a lo ni tawh bawk a ni.

Portugal chanchinbu lar A Bola pawhin Milan khelh dan chu an sawisel nasa hle a, "rinngam a la ni lo hle" tiin, an khelh dan phung a tlawm em em tih an tarlang. Rossoneri te hian an khelh dan phung mumal tak (identity) an nei lo niin an sawisel a, starting lineup leh tactics thlak kual chhen a nih avangin team inkalpui dan a buai phah vek niin an ngai a ni.

Chu mai bakah, tlarhma lam an innawr nasat laia tlarhnung him loh theihna awmte, tlarhmaa goal hlauhawm an siam theih tlem lutuk leh squad chhungah player rintlak indaih tawk lohna te chu A Bola hian an kawk bawk. Matteo Gabbia hliam chuan an tlarhnung a tiderthawng hle a, chutih rualin forward thar Goncalo Ramos-a thlaktu awmchhun atana Amorim-a ngaih Francesco Camarda lah chu minute nga chiah khelhna hun pek a la ni thung.

€70million chuang senga an lakluh Ramos pawhin Italy chanchinbute sawisel a tawk nasa hle. Corriere dello Sport chuan he striker khelh dan tehnaah 5.5 rating an pe a, first half tawp lamah chauh chance a neih thu leh inkhelh dang zawngah a reh hmak thu an tarlang. Gazzetta dello Sport pawhin Ramos-a goal khung tura Milan an tuihal zia an tarlang a, player man to tak ni chunga beisei a phak loh avangin social media lamah fan-te chuan "Ghostalo" tiin an ko phah hial a ni.

Inkhelh zawhah Amorim chuan, "Hma hruai kha chu kan phu ngei mai, mahse goal kan neih hnu khan inkhel kha ṭha zawkin kan thunun tur a ni a, ball vawn tam zawk a, khingpuite rawn chet letna tur kha kan dang chat tur a ni. Corner aṭangin goal kan chhuah tur a ni lo bawk. Hetianga point hnih kan paihbo ngawt mai hi chu kan lungawi thei lo a ni.

"A chang chuan hei hi rilru puthmang (mentality) chungchang a ni ṭhin. Goal i khung tawh a nih chuan i nawr zui zel a ngai a, khingpuite'n chet let an tum dawn tih a chian sa avangin ball kan chang tam zawk tur a ni," tiin a sawi.

Amorim hian January thla tira ban a nih hmain Manchester United-ah thla 14 chhung hun a lo hmang tawh a. Old Trafford a chhuahsan chhan ber chu director of football Jason Wilcox telin club hotute nena an inlaichinna a chhiat vang a ni. Player-te leh club hotu liante mipui hmaa a sawisel fo ṭhin bakah, a tactics duhzawng 3-4-3 formation a thlak duh miah loh avang leh team hmasawnna hmuh tur a tlem lutuk avangin Manchester-ah khan ban a tawk ta a nih kha. Milan-ah pawh hetiang zia hi a la rawn lantir chhunzawm zel avangin a dinhmun a derthawng chho leh ta hle a ni.