Thawhleh zan Champions League inkhela Atletico Madrid laka an tlawm hnuah, Lisandro Martinez chuan club hruaitute a bei na hle a, mahse Manchester United director of football Jason Wilcox-a dinhmun erawh a la nghet tlat niin hriat a ni.
Martinez hian inkhelh zawhah inremna neihsa angin broadcast interview a nei a, UK-a Amazon Prime leh US-a CBS hnenah kumin nipui transfer bazar-a club hotuten hmasawn duhna rilru lian an pu tawk lo chu a sawisel a ni. Kum 29 mi Argentina defender hian Amazon Prime hnenah, "Kan technical director lakah beisei ka nei sang zawk," tiin a sawi a. Tun season-ah inelna hrang hrang match kua an khelh tawhah vawi hnih chiah an chak avangin, head coach Michael Carrick-a lam kawk lovin thuneitu sang zawk te chu zawhna zawh tur an nih thu a kawk bawk a ni.
Kumin nipui chhung khan United hian first-team player lak nan £155million an seng a, hei hi Premier League-a kaisang thar Ipswich Town leh Hull City ten an sen zat aia tlem a ni. Hei vang hian Carrick chuan left-back pangngai Luke Shaw chauh a nei a, striker pangngai atan Benjamin Sesko chauh a nei bawk a, tunah hian an pahnih hian hliam vangin an chawl ve ve a ni.
Leeds aṭangin goalkeeper Karl Darlow chu a thlawnin an la a; Carlos Baleba, Andrey Santos leh Youri Tielemans te midfield thuam chak nan an lalut bawk a, Madrid-a an inkhelhah heng player thar pathumte hian bul an ṭan vek a ni. Mahse Newcastle United left-back Lewis Hall lakluh kawngah United an khawtlai lutuk a, Magpies lamin an hralh dawn lo tih a chian hnuah chauh an va dawr a, Sesko-a elpui tur striker dang lak an tum lo bawk a ni.
Martinez-a thusawi hi dressing room chhungah player dangte pawhin an thlawp hle nia hriat a ni chungin, Wilcox-a dinhmun erawh a ngaihtuahawm loh thung. Manchester City academy director hlui hi April 2024 khan technical director angin Old Trafford a zawm a, Dan Ashworth-a chhuah hnu thla ruk lekah, June 2025 khan director of football atan hlankai a ni. Wilcox hian Man City-a a lo thawhpui tawh chief executive Omar Berrada nen inlaichinna ṭha tak an nei a, Thawhlehni khan Metropolitano stadium-ah an pahnih hian inkhel an en dun a ni.
Chu mai bakah, club co-owner Sir Jim Ratcliffe nen innel tak an ni a, Ratcliffe hian a football hriatna leh theihna a fak hle bawk. Ratcliffe pawh hi Madrid-ah a inlan ve bawk a ni. Co-owner hian thla li chauh a awm hnuah Ashworth chu a lo ban tawh a, Wilcox erawh a thlawp tlat a, football thuneitu lamah inthlakthlengna siam nawn leh chu club hian an duh tawh lo a ni.
Hetianga thil a thleng hi hun remchang lo tak a ni a, Carrington-ah Wilcox hi squad kiangah a awm ngun hle a, Berrada nen Carrick-a hmabak reltu tur ber an ni bawk. Kum 45 mi Carrick hian season bul an ṭan chhiat em avangin pressure sang tak a hmachhawn mek a, mahse Martinez-a thusawi aṭang khan player-te chuan an head coach an la thlawp tlat tih a chiang hle.
United chuan Martinez-a chungah eng hremna nge an lek dawn tih an la ngaihtuah mek a. Nilaini khan squad hi an chawl a, Ningani hian he buaina hi sawiho a chinfel a beiseiawm a ni. January khan Wilcox-a chanchin mipuite hmaa a sawisel avangin Ruben Amorim chu ban a ni tawh a, mahse Martinez erawh chutianga ban chu a rinawm loh thung. Pawisa chawitir emaw, hun reilote inkhel thei lova hrem emaw a ni maithei a ni. He Argentina international hian kumin nipuiah hian contract a hmang zo dawn a, United hian thla 12 pawhsei theihna option nei mah se, an hmang chhunzawm duh dawn em tih erawh hriat a la ni lo.
