Champions League inkhela Atletico Madrid laka Manchester United 2-0 a an tlawm hnuah chanchinbu mite an buai zui hle a. Inkhel ṭan aṭanga second 50 lekah goal an chhuah bakah Leny Yoro chu red card pek a ni a, mahse inkhelh zawha Lisandro Martinez-a thusawi chuan sawizui a hlawh ber ta zawk a ni.

Kum 28 mi Argentina international Martinez hian Amazon Prime hnenah beisei loh takin thu na tak tak a sawi a, hemi hnu hian NBC Sports hnenah a ṭawng chhunzawm leh bawk. Nipui transfer bazar lai khan squad thuam chak kawngah Manchester United hotute chu sum chelh lutukah a puh a; hei hian Champions League an luh leh tak hnua inelna hrang hranga inlan tur player inthlak kual (rotate) kawngah head coach Michael Carrick chu thlan tur nei tlem lutukah a siam niin a sawi chhuak hial a ni.

United ṭantute tam zawkin Martinez-a thusawi hi dik an tih rualin, khatianga mipui hmaa a sawi chhuak kher erawh ngaihdan a inang lo hle a. Club legend Wayne Rooney phei chuan zahlohna lian tak a nih thu a sawi nghe nghe. Hei hian Old Trafford-a he defender-a hmabak a tichiang lo hle bawk.

Jason Wilcox leh Ineos-in thuneihna an pek club hotute laka United fans-ten an lo sawi fo ṭhin chu Martinez hian a rawn tlangaupui a ni ber a. 2026-27 campaign hmaa ticket khapna thil avanga fan-te laka an tlaktlai loh ang bawkin, Ineos hi United dressing room chhungah pawh an ngainat tehchiam loh thu a lang chhuak bawk. Hemi hnu darkar 24 lekah Martinez chuan a thil sawi chungchangah thuchhuah a siam zui ta a ni.

A Instagram stories lama a thuchhuahah chuan, ngaihdam dilna ṭawngkam hman a hnekin "Ka ṭawngkam khan ka rilru dik tak a pholang a ni," tiin a tarlang a. He thuchhuah hian Wilcox ang chi club hotute mawhphurna hriattir duh tute rilru a khawih hle a ni.

Martinez-a thuchhuah siamah chuan heti hian a ziak:

"Nimin lama ka thusawi chungchang an sawi zui hrang hrang hnuah hian, ka thil sawi leh ka rilru awm dan tlem tarlan ka duh a ni. Inkhelh zawh khan kan thil duh ber result kan hmuh loh avangin thinrim leh beidawng tak chungin ka ṭawng chhuak a.

"Min hrechiangtute chuan football ka atchilh zia te, inpekna leh chak ka duhna a nasat zia an hria ang. Thil a kal tluan loh hian a na ṭhin em em a, a bikin Manchester United ang club ropui leh hmingthang aiawh phei chuan a na lehzual a ni.

"Ka ṭawngkam khan ka rilru dik tak leh he club hian nomawi lian ber berte a inchuh ka hmuh chak zia a pholang a ni. Hetiang dinhmun sang beisei hi football ka thlir dan leh he jersey hak hian a ken tel mawhphurhna lian tak chu a ni.

"Thil tam zawk ka ngen hian, he club-a awm zawng zawng hian kan neih tur thiltum sang tak chungchang ka sawina a ni. Ṭhang lian zel tur te, chak zual zel tur leh inelna sang bera inlan thei tura kan mamawh zawng zawng nei tur kan ni a. Hengte hi keimah aṭanga ṭanin kan vawn tlat tur a ni.

"Eng dang zawng aiin khelmual chhungah chuan keini player-te hian kan theihna kan pholang hmasa tur a ni tih ka hria a, chu mawhphurhna chu keimah ngeiin ka hmachhawn hmasa bawk ang. Mahni inphut sang zual a, Manchester United hi a chungnung bera dah let leh turin kan ṭan rual a ngai a ni.

"Ka team-mate-te, kan manager leh he club hmasawn nana thawk tute zawng zawng hi ka ring tawk a. Hmalam pan zelna tur chu thiltum sang tak leh inpekna nen thawh ho zel hi a ni tih ka chiang a ni. Ni hmasa ber aṭanga ka thil tum chu a la ngai reng; chak te, sang taka inel leh he badge tan hian ka theihna zawng zawng hlan hi a ni," tiin a sawi.

Martinez hian a thusawiah hian a hnungtawlh miah lo tih a chiang a. A team-mate-te lakah rinna a nghat lo tih thu thang chu a hnawl bawk a, Madrid-a an awm lai pawh khan player dang eng maw zatin a thusawi chu an thlawp thu tarlan a ni bawk. United hian he defender lakah hian hremna an lek dawn nge, zuihral tir an thlang dawn tih chu Pathiannia Leeds an tlawh hmaa Michael Carrick-a press conference neih turah a langchiang chho ang.