Manchester United defender Lisandro Martinez chuan Atletico Madrid laka 2-0 a an tlawm hnua club hotute laka a lungawi lohna a au chhuahpui hrep chungchangah thuchhuah siamin, a thusawi chu a ṭangpui zui a, ngaihdam erawh a dil duh bik lo. He Argentina international hian English leh European football-a United dinhmun sang bera hruai chhoh leh a duh zia tarlangin, tun dinhmuna club dinhmun chhe tak chuan a thinlung a tihnat thu a sawi.

Thawhlehnia Spanish khawpuia Atletico Madrid laka 2-0 a an tlawm hnu khan Martinez-a thusawi hian chanchinbu hmai a luah nghal hle a. Kumin nipui bazarah Michael Carrick-a naute hian Carlos Baleba, Youri Tielemans leh Andrey Santos te la lut tawh mah se, he central defender hian khelmual hmun hrang hranga inelna sang leh squad thuamchakna tur player lak belh an neih tlem lutuk chu a lo sawisel hrep a nih kha. He tlawmna hian inelna hrang hrangah match nga (5) chhung chak nei lova an awmna a thlen a, Premier League table-ah 13-na dinhmun luahin, Pathianni hian Elland Road-ah Leeds United an pan a ngai dawn bawk.

Nilaini khan Martinez chuan a Instagram story hmangin thuchhuah a siam a: "Nimin lama ka thusawi chungchanga ngaihdan hrang hrang awm mekah, ka thil sawi leh ka ngaihtuahna hi tlem phawrhchhuah ka duh a ni. Match zawh khan kan thil duh ber result kan hmuh loh avangin thinrim leh rilru hah tak chungin ka ṭawng chhuak a. Min hrechiangtute chuan football ka nunpui dan, ka phurna, ka inpekna leh chak ka duhna lian tak hi an hria ang. Kan duh anga thil a kal loh hian a na ṭhin a, a bikin Manchester United anga chanchin ropui leh hming lian nei club aiawh tana khelh phei chuan a na lehzual a ni.

"Ka thusawite khan he club hian nomawi lian tham a inchuh ka duh zia a tilang a ni. Heng standards sang takte hi football ka thlir dan leh he jersey hak hian mawhphurhna a rawn kentel a ni bawk. Thil tam zawk ka phut ka tih hian, he club-a awm zawng zawngte hian thiltum sang kan neih a ngai tih ka sawina a ni. Ṭhang lian zel tur leh, chak zual zel turin, inelna sang bera kan tel theih nan kan mamawh zawng zawng kan neih a ngai a. Heng standards te hi keimah aṭanga ṭanin kan vawn nun a ngai a ni. A hmasa berin keini player-te hian kan theihna kan phawrh a ngai tih ka hria a, chu mawhphurhnaah chuan keimah ngei hi hmahruaitu ka ni. Kan inphut sang lehzual tur a ni a, Manchester United hi a chungnung ber nihna dinhmun thleng leh turin kan thawhhona kan ngheh a ngai a ni. Ka team-mate te, kan manager leh he club hmasawn nana thawktute zawng zawng hi ka ring tawk a ni," tiin a tarlang.

Thudawnte tarlan danin, a thil sawi avang hian Martinez hian club hremna a tawk thei dawn nia hriat a ni a. Sky Sports chuan Old Trafford hotute a sawisel hrep hnuah Ajax defender hlui hmabak hi a chiang lo hle niin a tarlang bawk. Chu mai bakah, Spain aṭanga in lama thlawhna an chuan haw laia a team-mate pakhat nena an inhnial thu pawh tarlan a ni bawk.

Match zawh chiaha chanchinbumite hmaa Martinez-a'n a sawi chhuah danah chuan, "Season liam ta khan season ṭha tak kan hmang a, tunah chuan hotu lu lam aṭang hian beiseina sang zawk kan nei a, inelna hmachhawn turin player tam zawk kan mamawh a ni, club dangte pawhin player tam tak an lalut a nih hi. Atletico khan team ṭha tak an nei a, chak pawh an phu reng a ni. Sum thehchhuah tam zawk ka beisei a, za zela za (100%) ka beisei a ni. Kan technical director [Jason Wilcox] aṭang pawh hian beiseina sang zawk ka nei. Player te kan tihtur kan tih a ngai tih chu a chiang, mahse hetiang zan tana inpeih tur chuan squad chak tak din a pawimawh hle a ni. Zaninah hian coach emaw player-te emaw puh mai hi a awlsam hle a, mahse hmun dang pawh kan thlir a ngai a ni. Manager inthlak, inthlak, inthlak reng mai chu thil theih a ni lo. Hmun dangte hi eng nge a nih ve? Thudang ka sawi thei rih lo," tiin a lo sawi a ni.