Manchester United-in tun season an ṭan dan duhawm loh zet chu zep rual a ni tawh lo va. Michael Carrick-a enkawl United hian inelna hrang hrangah match 10 an khelh tawh aṭangin vawi hnih chauh hnehna an la chang a ni.

Sir Alex Ferguson-a'n chawlh a puan hnu aṭanga buaina ngai bawk kha United ṭantute chuan an hmu nawn leh mek a, hetiang zela an khelh a nih chuan Michael Carrick hian a hna a chan a ngai maithei a ni. Defender Lisandro Martinez-a'n club board hotute laka a lungawilohna a au chhuahpui hnuah, Talking Points kaltlangin United-in eng nge an tih tak ang tih chungchangah fan-te ngaihdan lak a ni a. Hetah hian chhanna lo lut chuan mi tam tak a ti-bangbo hle a ni.

Fan-te ngaihdan tarlan aṭanga a lan danin, za zela panga (5%) chauhvin Michael Carrick-a ban ngawt hi club buaina chinfelna a nih an ring a. Hei hian United ṭantute chuan Carrick-a'n ban a tawk ang tih an hlauhthawn rualin, a ban ringawt hian club harsatna tawh mek hi a sualpui zo dawn lo tih an hriat chian zia a pholang chiang hle. Kum 10 liam ta chhung khan thil a kal sual chang apiangin manager hlir mawhphurtuah an lo dah tawh ṭhin a, tun ṭumah erawh manager chauh hrem chu an duh tawh bik lo a ni.

Ngaihdan petute ngaiha inthlakthlengna pawm tlak awmchhun chu, sawisel hlawh em em technical director Jason Wilcox pawh chhuahtir ve nghal hi a ni. Ngaihdan petu zinga a zatve aia tam mah (50% chuang) chuan Wilcox hi ban nise an duh a, za zela 22 (22%) dang chuan Wilcox leh Carrick te pahnih ban kawp nghal chu thutlukna dik ber turah an ngai thung.

Hei hi Ineos tana thutlukna lian leh hautak ber tur ni mah se, technical director thar leh manager thar an lak dun theih chuan thutlukna fing ber a tling maithei a ni. Kumin nipui bazaar-a club chet dan laka Martinez-a thinrim au chhuah hnuah hian Ineos chuan thutlukna engtiang chiah nge an siam dawn tih chu tun thla chhung hian hriat theih a ni mai thei.

Tun season Premier League game sarih an khelh tawhah United hian point 7 chiah an la hmu a, league-a an chak hnuhnun ber phei chu August thla daih tawh kha a ni. Kar tharah mahni mual Old Trafford-ah Bournemouth an mikhual dawn a, hetah hian an tlawm leh a nih hlauh chuan Carrick-a tan chuan a pawi hle dawn a ni.

Carrick hi ban ni ta pawh nise, Jason Wilcox-a chunga nawrna awm erawh a reh dawn chuang lo. Wilcox hi Ruben Amorim laluta ban lehtu, chumi hnu kumin tir lama Carrick ngheta ruattu kha a ni a. Player lakluh kawnga club chet chhiat dan Lisandro Martinez-a'n a sawisel pawh kha a dik chiah a, technical director aṭanga inthlakthlengna a awm loh chuan Carrick-a thlaktu tur pawhin buaina ngai bawk hi a hmachhawn leh ngei a rinawm a ni.