Manchester United-a a luh tirh season aṭanga hliamin a tlakbuak fo bakah a khelh ṭhat tawk loh chang awm ṭhin mah se, Argentina defender Lisandro Martinez hi head coach Michael Carrick-a hnuaiah first-choice defender pawimawh ber a la ni reng a ni.
Martinez-a hruaitu nihna (leadership), ball khawih thiamna leh inkhelh chhiar thiamna te chu United tan thil hlu tak la ni reng mah se, kum 28 a tlin tak hnu hian contract thar pek tur em ni tih thutlukna siam chu thil awlsam a ni lo. Tunah hian Martinez-a chungchanga United dinhmun leh ngaihdan chu a rawn lang chiang ta a ni.
United tana thil lawmawm tak chu, Martinez-a contract neih lai hi kum 2027-ah tawp dawn mah se, club hian kum khat dang (kum 2028 thleng) pawtsei thei turin option an nei sa hlauh a, he clause hi engtik hunah pawh an hmang thei reng a ni. Club leh player inkarah inremlohna leh lungnihlohna engmah a awm loh avangin, Harry Maguire-a chunga an lo tih tawh ang tho khan, he option hman kawngah hian harsatna a awm an ring lo a ni.
Transfer chanchinbu mi lar Fabrizio Romano chuan United hian Martinez hi dressing room chhunga hruaitu pawimawh takah an ngai reng tih tarlangin, dinhmun chu thunun theih chinah an ngaih avangin nakin lawkah inbiakna an neihpui dawn thu a sawi a ni.
Romano chuan, "Man United hian kum 2028 thlenga contract pawtsei theihna clause an nei a. Chuvang chuan an thla a muang a, dinhmun pawh an thunun theih chinah an ngai a ni. Kum 28 mi a ni a, tawnhriat ngah vanglai tak a ni bawk. Tun hnai kum liam ta chhung khan hliam vangin vanduaina tawk zeuh zeuh mah se, Man United chuan Lisandro hi hruaitu leh top defender a nihnaah an la ring tawk hle a ni.
"Tun dinhmunah chuan thil engkim a kal tluang a, an thunun theih chin a ni. Thla tlemte lo awm tur chhung hian inbiakna chu a thleng ngei dawn a ni. Club dang nena inbiakna thuk tak neih a awm lo bawk a, chuvang chuan he thil hi thunun theih chinah an ngai a ni," tiin a sawi.
United hian Martinez-a thawhhlawkna hi ngai hluin khelmualah pawh a la chhawr tangkai viau rualin, contract thar ziahpui kawngah hian fimkhur a ngaihna chin a awm bawk. Martinez hian contract thar a ziah hunah chuan kum 30 a hnaih tawh dawn a, chutih laiin Carrington academy aṭangin tlarhnung defender naupang theihna sang tak tak nei an rawn chhuak mek bawk a ni.
Tunah pawh hian Martinez leh Maguire te inkawp Carrick-a'n a chhawr ngun lutuk avangin rawlthar dangte ṭhanlenna a dang chep deuh em maw tih chu sawiselna a awm tawh bawk. Chuvangin contract thar an ziahpui a nih pawhin, hlawh tlem zawk leh squad-a a khelh tam dan tur bithliah thar nena kal a nih a ngai dawn nia ngaih a ni a; chuti a nih loh chuan United chu player kalsan thiam lo club dawngdah angin miin an ngai mai dawn a ni.
