Referees chief Howard Webb chuan Manchester Derby-a Manchester United an tlawm ṭum khan referee-te lam aṭangin tihsual lian tak a awm tih pawmin, United hotute chu vawihnih ngawt phone hmangin a bia tih a sawi chhuak.

Manchester Derby inkhelah hian Man City chuan second half-a Erling Haaland-a goal thun hmangin United hi 1-0 in an hneh a ni. A tirah khan he goal hi khelmual chhungah pawm a ni lo (offside) a, mahse VAR hmanga enfiah a nih hnuah offside-a awm Enzo Fernandez chuan inkhelh a tibuai nia lang mah se, goal hi pawm zui a ni ta hlauh a ni. Webb chuan he thutlukna hi "tihsual lian tak" (significant error) tiin a sawi.

Inkhelh zawh khan Pro Ref lam chuan tihsual a awm tih pawmin United hi an dawr tawh a. Webb hian amah ngei a inrolhin United club hotute a biak thu a sawi lang zui a ni. The Times hnenah sawiin Webb chuan, "Director of football Jason Wilcox leh club secretary Rebecca Britain te ka bia a, kan tihsual a ni tih ka pawm thu ka hrilh a ni," a ti.

A sawi zawmnaah, "Tihsual avanga ngaihdam dilna hi kan siam fo ngai lo va, mahse he thil thleng hian nghawng lian tak a neih avangin ngaihdam ka dil ta a ni — hei hi thutlukna harsa tak (judgment call) zinga mi a ni lo," tiin a sawi.

Former referee Webb hian mi tam takin thil langsar tak pawh an rilru hmun danga a aipuh avanga an hmuh hmaih ṭhin dan 'inattentional blindness' chungchang psychological experiment entirna hmangin a sawi chhuak a. "Mipuiin a taka an hmuh hian an awih thei lo ṭhin. Khelmuala rawlthar ten basketball an khelh laia gorilla-in a awm a vaw thut thut ang mai hi a ni a, a lang chian em avangin hmuh loh rual a ni lo. Mi tupawhin 'Saw gorilla saw va en ta che u!' an tih a ngai a ni," tiin a sawi.

He thutlukna chungchanga buaina a chhuah hnu hian, Pro Ref external consultant Inaki Vicandi Garrido chuan thil thleng hi endik lehin, match referee Michael Oliver, VAR official Matt Donohue leh assistant VAR Blake Antrobus te chu zawhna a zawt zui a ni. Premier League match kar thar khelh a nih hmain Pro Ref match official zawng zawngte nen video call hmangin inbiakna an nei a, a taka inhmuhin he thil thleng hi an zir chiang zui bawk.

He match-ah hian Haaland-a goal chungchang chauh hi buaina a ni lo. First half-ah Man City player Phil Foden chu United captain Bruno Fernandes-a laka a ke a hman avangin red card intihchhuah a lo ni tawh a. Hemi hmain Fernandes hian City forward hi a khawih hmasak nia a lan avangin ani pawh hi red card pek tur nia sawi a awm bawk a ni.