Manchester City-in Premier League dan an bawhchhiat chungchanga thubuai 115 an hmachhawn mek zinga 114-ah thiam loh chantir an nih tur thu The Athletic-in a tarlan hnuah, an lo lak tawh nomawi leh title zawng zawng chu rinhlelh leh ngaihven a hlawh chho ta hle.
He thubuai ropui tak hian City laka hremna pek theih hrang hrangte chungchangah inhnialna lian tak a chawkchhuak a. Hremna hrang hrang zingah hian division hnuai lama tla tura hrem (relegation) thlengin, division pakhat aia tam tlatir theihna pawh sawiho mek zingah a tel a ni.
Hetih rual hian City-in nomawi an lo lak tawhte chu hlihsak a, titawp (void) a, an dawt chiah a pahnihna (runners-up) lo ni tawhte hnena hlan tur nge tih chungchangah ngaihdan a inang lo hle bawk. Hetiang thil hi kum 2005-06 khan Italy ramah a lo thleng tawh a, sum leh pai lama dik lo taka an chet avangin Juventus chu an title hlihsakin Serie B lamah tla tura hrem an ni a, an nomawi chu Inter Milan hnenah hlan a lo ni tawh a ni.
City-in dan an bawhchhiat hun chhung huam chhung hian, Manchester United chu kum 2012 leh 2018 khan vawi hnih ngawt pahnihna an lo ni tawh a, dan ang taka chhut chuan league title pahnih hi an dawng thei dawn tihna a ni. Manager hlui Jose Mourinho pawhin he thil chungchangah hian a ngaihdan a lo tichiang tawh bawk a ni.
TalkingPoints lama Manchester United fan-te ngaihdan lakna (poll) an buatsaihah chuan ngaihdan a insem darh hle a. Tun dinhmunah chuan fan zaa 60 (60 per cent) chuan Red Devils hnenah City nomawite hi hlan ni se an duh laiin, zaa 40 (40 per cent) erawh chuan 'title hi ṭhulh tawp se, tu mahin dawng suh se' tih an thlang thung.
Fan pakhat chuan City chu division hnuai lamah a zawnin thlaktir ni se, an hnuai chiaha awmte hnenah title pek ni se a ti a. A neitute pawh sum tam tak chawitir a, England rama club nei thei tawh lo tura hrem ni se tiin a sawi. Fan dang leh erawh chuan City title te hi hlihsak ni mah se, champion awm lovin ṭhulh tawp zawk se a ti bawk.
Fan dang leh chuan, "Bumna tuartute hnenah hlan ni se," tiin a sawi a, sum lama zangnadawmna (compensation) chungchang a sawi chhuak bawk. Manchester United pawh hian sum an hloh tam tak avangin City lakah hian thubuai thehlut ve turin club dangte an zawm thei dawn a ni. Premier League thuneihna leh dikna pholang turin league aṭanga pet chhuah hial an phu niin an sawi bawk.
Fan dang leh erawh chuan City title hlihsak chu thil ṭha tak a nih rualin, khelmuala theih tawp chhuaha hnehna lo changtu player-te tan a dik tawk dawn em tih zawhna a siam ve thung a ni.
Tun dinhmunah chuan football khawvel chuan City laka thubuai chungchanga thuchhuah puitling puanzar hun tur an la nghak mek a ni. Hremna leh hmalakna hrang hrang a rawn zui nghal dawn a, mahse a hun erawh a pawtsei maithei. City hian thutlukna a chhuah hunah CAS lamah zualko (appeal) an thehluh ngei a rinawm bawk a, hei hian thubuai hi a pawtsei leh zual maithei a ni.
