Manchester United chu Pathiannia Manchester City laka 1-0 a an tlawm hnuah an la phili deuh reng a, Carabao Cup-a Brighton hmachhawn tura an inbuatsaih laiin rawlthar JJ Gabriel-a'n club chhuahsan a dil thut avangin an hliam a belhchhah hle. Champions League khel tura tling, manager Michael Carrick-a chu nipui transfer bazar chhung khan hotuten an thlawp ṭha hle a, tlar laili thuam nan Andrey Santos-a, Youri Tielemans-a leh Carlos Baleba-a te chu an la lut a ni.
Mahse, tun season Premier League-ah match li khelh tawhah United hian point li chauh an la hlawhchhuah a, vawi khat chauh chak hrihin, vawi khat an inhnehtawk a, vawi hnih an tlawm tawh a ni. Pathianni liam ta khan player 10-a khel Manchester City lakah 1-0 in an tlawm zui bawk. An hmachhawn leh tur chu Baleba-a club hlui Brighton an ni a, mahse club legend Wayne Rooney-a chuan United-in kumin nipuia player an lakluh dan chu a lo sawisel tawh thung.
Rooney-a chuan Chelsea aṭanga Santos-a an lakluh dan chu a bik takin a sawisel a. City laka an tlawm hnuah 'Stick to United' podcast-ah sawiin, "Player kan lakluhte lakah hian kan fing deuh a ngai a ni. Ka hriatthiam loh chu, Tielemans-a leh Santos-a kan la tawh a, hemi hnuah Baleba-a kan la leh a, Baleba-a hi chu lakluh ṭha tak a ni. Mahse Santos-a chu bench-ah a ṭhu leh si a. Baleba-a a lo fit hunah Tielemans-a hi bench-ah a ṭhu dawn tihna nge, Kobbie Mainoo-a zawk hi bench-ah a ṭhu dawn?
"Heti a nih chuan, player i lak thar pahnihte emaw, United tana match hnih liam ta chhunga khel ṭha ber Mainoo-a zawk emaw chu bench-ah an ṭhut a ngai dawn a ni. Carrick-a hian chhan eng emaw vangin Santos-a hi a duh lo a nih chuan, he player lakna atana sum kan hman tak kha eng vanga full-back emaw striker dang lak nan hman zawk loh nge a nih?" tiin a sawisel hle.
Hemi hnu hian, Brighton laka bench-a ṭhut tir leh khelmuala inlan tir hial an rilruk mek, kum 15 mi Gabriel-a'n chhuah a dil tak thut avangin United hotute chu an barakhaih hle a ni. Thawhlehni tlai khan Gabriel-a chhuah duhna hi a rawn lang chhuak a, chhuah a duh vawm vawm avangin club training-ah pawh a tel duh lo a ni. Brighton lakah hian inlan se chuan, United chanchina khel thei naupang ber record a siam dawn a ni. Club hotute chuan he thil thleng hi mak an ti hle a, eng vanga chhuah duh tlat nge a nih pawh an la hre lo a ni.
Kum 11 a nih aṭanga United-a awm tawh Gabriel-a chungchang hi siamṭhat leh theih an la inbeisei hle a. A dilna hi engmah ni rih lo mah se, United hian an register tawh miau avangin an paih chhuak mai thei rih lo a ni. Kum 17 a tlin hma chuan professional contract a ziak thei lo va, kum 16 a tlin hma chuan scholarship agreement pawh a ziak thei lo bawk. Chuvangin, tun season tawp thleng chu United-ah hian a in-register tlat dawn a ni.
Kum 2025 khan Gabriel-a hian chhuah a lo tum tawh a, khatih ṭum khan director Jason Wilcox-a'n inrawlhin cham chhunzawm turin a lo thlem lungawi tawh a ni. Mahse, Gabriel-a hian Irish passport a kawl avangin kum 16 a tlin rualin ram dang club a pan thei dawn a. Barcelona chuan he rawlthar hi an ngaihven hle a, Germany leh England-a club lian dangte pawh an inpeih at reng dawn a ni.
