International break hnuah Manchester United chuan Inrinni hian Premier League match-ah Tottenham chu mahni mual Old Trafford-ah an lo mikhual dawn ta a. Match inbuatsaihna kal mekah fans-te titi ber pakhat chu an rawlthar theihna ngah tak JJ Gabriel-a hmabak hi a ni.
September thlaa he wonderkid chungchanga thil thleng ṭhawnna tak awm hnuah, first-team-a inlan a tum pui tawk loh avanga Old Trafford chhuahsan a duh nia sawi a ni a. Mahse United defender hlui Phil Bardsley chuan he kum naupang tak hi Premier League-a inlan turin taksa lamah a la inpeih lo nia a hriat thu a sawi.
talkSPORT hnenah Bardsley chuan a naupan laia rawlthar rawn inkhawh chho Wayne Rooney nen khaikhawhin, "Pawn lam aṭanga thlirin, he inelna sang taka inlan tur hian taksa lamah a la inpeih tawk lovin ka hria. Kum liam taa player puitling hma takte kan thlir chuan, Rooney te kha chu khami kumah khan inpeih sa thlap an ni," a ti.
Bardsley chuan sawi zawmin, "Naupang theihna hi chu zawhna awm miah lovin a sang em em a, player ropui tak a la nih ngei pawh ka beisei. Mahse, club-a thil thleng leh thu chhuak vel hian hun a nang fuh lo a ni. Rawlthar, puitling football-a an inhlan kai laia hetianga nawr fo hi agent te leh nu leh pate nawrchhuah a nih hmel a, dawhthei taka nghah a pawimawh a ni," tiin dawhtheh taka nghak hram turin a fuih a ni.
Hemi rual hian United leh an elpui Arsenal te chuan Bayer Leverkusen star Christian Kofane-a'n contract thar ziah tumna a chawlhtir (put on ice) tak avangin ngaihven zui theihna hunṭha an hmu nia ngaih a ni.
SportBild-in a tarlan danin, English club pahnihte hian he kum 20 mi Cameroonian hi an lo thlithlai reng tawh a. Leverkusen hian Kofane-a hnenah hlawh tam zawk leh kum 2031 thleng daih contract thar chhawpchhuah tum mah se, an rawtna leh player inbeisei zat a inthlauh avangin inremna an nei thei lo a ni.
Erik ten Hag-a'n Germany-a a hruai luh ṭuma a contract ziah mek hi kum 2029 thleng a la daih a. Mahse contract thar inbiakna an chawlhtir tak avang hian United leh Arsenal hian he player theihna ngah tak hi lakluh nan hunṭha a inhawng ta nia hriatna an nei mek a ni.
