Premier League match pawimawh takah Pathianni hian Manchester United chuan Craven Cottage-ah Fulham an tlawh dawn a. He match hmachhawn tura inbuatsaih mek inelna hmaa chanchinbumite nen an inbiaknaah, United head coach Michael Carrick chuan media-te zawhna hrang hrang a chhang a ni.

Tun season-a United goal chhuah hnem lutuk chungchanga zawhna rawn awm chu chhangin, Carrick chuan an tum dan ang a nih loh thu a pawm a. "Bul ṭan dan duhawm tak a ni lo chiang a ni. Team angin hmasawn kan mamawh a, hei hi tlarhnung vengtute leh goalkeeper chauh mawhphurhna a ni lo a, team pum thawhho dan tur a ni. Chuvangin tlar hma aṭanga tlar hnung thlengin hma kan sawn ngei a ngai a ni," tiin a sawi.

Kar kalta inelnaa defender rawlthar Leny Yoro leh Ayden Heaven-te chet chhiat deuh chungchangah, Carrick chuan rawltharte tan hei hi zir tur pawimawh a nih thu sawiin an pahnih hian a chhan zui a. "An pahnih hian match ṭan tirhah chuan an che ṭha hle a. Football-ah chuan hun ṭha leh hmun harsa paltlang hunte a awm ṭhin a, thil thleng aṭang hian zir tur zawk kan nei ṭhin. Leny hi kum 20 chauh a la ni a, United central defender nih hi hmun harsa leh mi hmachhawn sang tak a ni. A zir mek zel a, match khat vanga thutlukna hmanhmawhthlak (knee-jerk decision) siam ngawt hi ka ti ve dawn lo hrim hrim. Leny-a chungah hian rinna sang tak kan nei a ni," tiin a sawi.

Manchester City laka player pakhat hrem an nih hnu pawha an tlawm zui leh, score 2-goal leka an hmahruai sa an hloh leh mai ṭhin chungchang zawhna chu Carrick chuan chhangin: "Kan goal chhuah tlem zawka inkhel thunun dan kan zir a ngai a ni. Attacking football mawi tak khel chhoin goal tam tak kan khung ṭhin a, mahse goal chhuah tlem kawngah balance dik tak kan neih a ngai a ni. Recent result hnih khat vang mai khan buaina lian tak angin thil kan thlir tur a ni lo," a ti bawk.

Referee-ten (PGMOL/Pro Ref) thutlukna sual an siam avanga ngaihdam an dilna chungchang pawh Carrick hian a sawi chhuak a. "Referee-ten tihsual an nei tih rawn pawma a hmun ngeia an rawn sawi hi ka zah em em a, mahse he ngaihdam dilna hian result hmasate chu a thlak danglam thei tawh lo. Football-ah chuan thil thleng a ni a, tunah chuan kan hma a thil awmte hmachhawn a, winning ways-a kir vat hi kan thiltum ber a ni," tiin Carrick chuan a tlip ta a ni.