Manchester United manager hlui Erik ten Hag chuan banna a hmuh hmain club board-te'n an thutiamte an mung a, chung an thutiam mung zinga pakhat chu Scott McTominay hralh loh tura an inremna a ni tiin a sawichhuak ta.

Ten Hag-a'n academy chhuak midfielder hi Old Trafford-a a cham chhunzawm zel a duh em em a, mahse United board-te chuan 2024 nipui transfer bazar chhung khan Napoli hnenah an hralh lui ta zawk a, a thlaktu atan Manuel Ugarte an la lut ta a ni.

Napoli a zawm hnu hian McTominay hi Serie A-a player ṭha berte zinga mi rawn niin, an club hi league nomawi a chawipui hial a ni. Kum hnih liam taa Scotland international-in Manchester United a chhuahsan hrim hrim khan "zahpuia tlawmngai tak leh beidawng tak" in a siam tih Ten Hag chuan a sawichhuak a ni.

The Athletic-in an kawmnaah Ten Hag chuan, "Ibiza-ah inremna kan siam a. 'Scott McTominay hi hralh phal a ni lo' tiin fiah takin ka hrilh a. Transfer window chhungin ruahmanna in-ang tak hmanga hma lak kan inbiakna pawh a ni. Argument pawh ka siam nghe nghe a, chhan pawh ka tarlang a: Goal khung theihna kan tlem em em a, Scott erawh chuan goal khung theihna leh rilru puitling tak a rawn thlen ṭhin a ni. A thisen inchung aṭangin United a ni bawk. Chuvangin a chhuah chungchang an rawn sawi ṭum khan 'A theih loh' ka ti bur a ni. Mahse a tawpah chuan an hralh ta thotho a. Kha thil avang khan ka zak em em a, ka beidawng takzet bawk," tiin a sawi.

McTominay hian United tana a season puitling hnuhnung berah inelna hrang hrangah goal 10 lai a khung a, Bruno Fernandes leh Rasmus Hojlund (goal 16 ve ve) te chiah a aiin goal khung hnem an awm a ni.

FA Cup final-a Manchester City an hneh hnua ni hnih leka contract pawtsei a nih chungchang pawh Ten Hag hian a sawichhuak tel a. Khatih lai khan a contract neih laiah kum khat chiah hmabak a nei tawh a, United chuan a contract hi kum khat dangin an pawhseitsak ta a ni.

"Contract-a kum khat chiah hmabak neih chhunzawm kha ka duh lo a. Chuvang chuan, 'Kum khat dang ka mamawh a, a hma aia thui thleng turin kan pahnihin nghet takin kan thawk dun tur a ni' ka ti a ni. Anni chuan ka lakah inrinawmna, min thlawpna leh inbiakpawhna ṭha tak min tiam a. Kan buainate pawh kan sawidun vek. Mahse an thutiamte chu an mung leh vek a ni. Chu thil avang chuan ka beidawng hle a ni," tiin Ten Hag chuan a sawi.

A hna aṭanga hnawhchhuah a nih dan chu thil hriatthiam harsa tak a nih thu sawiin, "Khatiang huna inṭhen kha a mak ka ti hle. Data zawng zawng pawhin kan ṭha tih an lantir vek a. Liverpool leh Spurs laka match ṭha lo pahnih kan nei tih chu ka pawm, mahse ruahmanna leh hmasawnna kan ṭan chho mek a, kan inkhelh dan phung pawh a ṭha chho hle. Player-te pawhin thildang an sawi maithei, mahse khelmualah chuan game tinah an ṭangtlang tih ka hmu reng a. Ka match hnuhnung ber pawh kha kan game ṭha berte zinga mi a ni a, West Ham kha kan hneh ngei ngei tur a ni. Mahse banna min pek tur ruahmanna kha a lo kal char char tawh tih ka chiang a, team chhungah pawh naktuka thil thleng tur lo hre lawk an awm tawh ngei ka ring," tiin Ten Hag chuan a sawi zui a ni.