Pathianni khan Elland Road-ah Leeds United leh Manchester United te chu hmuhnawm takin 1-1 in an inhnehtawk a. Daniel Farke-a naute lamin penalty hmuh ngei inbeisei mah se, referee Darren England leh VAR te chuan penalty hi an pe duh lo a ni.
He inkhel second-half chhung hian box chhungah Leeds captain Ethan Ampadu leh United defender Harry Maguire te chu an inbual buai a, Ampadu hi chhuatah a tlu zui bawk. Leeds player-te leh mualchhung ṭantuten penalty phutin ngen nasa hle mah se, referee England chuan inkhelh a chhunzawmtir a, VAR lam pawhin referee thutlukna hi an thlawp zui ta a ni.
Mahse, Professional Game Match Officials Board (PGMOL) hotu hlui Keith Hackett chuan he thutlukna hi a pawm thei lo hle. VAR-in 'boruak tihsan loh' (stay low key) an duh vang maia penalty hi pe lo an nih thu a sawi a. MOT Leeds News hnenah sawiin, "A nihna takah chuan, Maguire hi corner kick-ah chuan dan bawhchhe fo ṭhin a ni a, mi tuemawin penalty an pek hma loh chuan a kut leh a bante hi dan lova hman a chhunzawm zel ang. Maguire hian foul a khawih ngei a, referee England hian penalty chawihtir ngei tur a ni. VAR pawhin boruak tihdaih hram tumin inrawlh loh an thlang a, mahse referee England-a'n monitor-a thil thleng a enfiah theih nan an inrawlh ngei tur a ni," a ti.
Hemi piah lamah Hackett chuan referee Darren England-a dinhmun chu a sawisel zui bawk a. Elland Road-a match an khelh hma ni chiah khan Brentford laka Liverpool chak ṭum khan England hi VAR duty-ah a lo ṭhu tawh a, kha match-ah khan Keith Andrews-a naute chu red card vawi hnih pekin mi pakua (9) ngawtin an khelh zawh phah a nih kha. Gtech Community Stadium-a match harsa tak a vil hnuah England hi rilru lamah a hah (mental exhaustion) hle niin Hackett chuan a ngai a, first-half-a Bryan Mbeumo laka Ampadu-a'n ball chhuh a tum dan hlauhawm takah pawh yellow card a hmuhtir ngei a ngai niin a sawi bawk.
Hackett chuan, "Darren England hian he chet dan hlauhawm takah hian yellow card a hmuhtir tur a ni. A bul hnaiah a awm avangin a chet dan kha a hmu chiang lo mai thei a ni. Kar tawp buaithlak tak a ni a, ka ngaihdan chuan hahchawlhna hun ṭha a neih theih nan match khatah chauh mawhphurhna pe se a ṭha zawk ang. Rilru lam hahchawlh mamawh vang a ni," tiin a sawi.
Chutih laiin Sky Sports 'Ref Watch'-ah Premier League referee hlui Dermot Gallagher chuan thil thleng chu thlir dan dangin a thlir ve thung a. "An pahnihin an inhnuk buai a ni. Leeds player nambar 5 pawh hian Maguire hi a pawt a, a ṭhianpa a pawt thlu a ni zawk mah. Engkim kha a tluang a, inkhelh chhunzawmtir kha a dik zawk," tiin thutlukna siam chu a ṭanpui ve thung.
He draw chungchang hi sawiin United boss Michael Carrick chuan, "Inpekna thuk tak a lang ngei mai. Vawiinah hian a awm ngei pawh a ngai reng a ni. Nimin lawkah pawh ka sawi tawh a, rinhlelhna ka nei lo, ka thinlungah ka hre thei a ni. Group chhunga boruak leh inlungrualna hi tun hnaiah hetiang em ema ṭha hi ka la hre ngai meuh lo. Inkhelah hmuh ngei ka inbeisei a, kha chakna leh ṭanlakna kha ka hmu bawk a ni.
"Zing lamah khan he inkhelh chanchin leh fan-te tan bakah club tana a pawimawh zia ka sawipui a. An muala kal a, point hlawhchhuak tura mamawh awmte kan sawi dun a ni. Hetah i kal a, i inbuatsaih ṭhat tawk loh chuan fiahna lian tak a ni ṭhin. Khelh ṭhat famkimna a ni lo a, kan khelh ṭhat ber ṭum pawh a ni lo maithei; mahse, team inpumkhat zia pholangtu thil tam tak a awm a ni," tiin a sawi zui bawk.
