Tottenham nena an inkhelh ṭumin first half-ah Lucas Bergvall-a'n Kobbie Mainoo-a ball khawih lai a chhuhsak a, Mainoo chu a thinrim em avangin chhuatah a hnek chawrh mai a nih kha.
Manchester United head coach Michael Carrick chuan Spurs an hmachhawn hmain an team chu khelmualah zangkhai taka che turin a mamawh hle a, mahse khelmuala an chet dan erawh international break hmang lova tuifinriat kama awm mai mai ang chauh an ni thung. Fulham laka bench-a a ṭhut hnuah Carlos Baleba chuan kar thum chhung ngawt training a neih belh tawh chung pawhin, Carrick chuan Tottenham hmachhawn tur hian tlar lailia Youri Tielemans, Kobbie Mainoo leh Bruno Fernandes te inkawp chu a la ring nghet tlat a ni.
Fulham nen an inhnehtawk ṭum khan tlan kual tam lam (running statistics) ah United an tlahniam hle a, tlar lailia tha leh chakna mamawhna chinfel nan Baleba chu hman nghal mai awm tak a nih laiin, Carrick chuan Tielemans a thlang leh zawk a. Premier League match hmasa zawng zawngah a lo la chhawr vek tawh avangin a thutlukna hi a mak hran lo na a, a rah erawh a ṭha lo hle thung.
Minute 20 chhung zet chu Tottenham-in United tlar laili chu an palzut hneh em em a, Mainoo, Tielemans leh Fernandes te chu awlsam takin an paltlang zung zung a ni. He hun chhung hian Spurs-in mual an thunun hneh hle a, Roberto De Zerbi pawhin an chance neih tam tak zinga pakhat mah an khung thei lo chu mak a ti hial a ni. Marcos Senesi-a'n half-way line bul aṭanga Conor Gallagher ball a peka, Tielemans leh Mainoo inkara a pet tlang ṭum phei chuan anni pahnih chu bangbo takin an inen tawp ringawt a ni.
Tottenham chu an fit ṭhain an hriam zawk a, ball chan zat pawh an ngah fe zawk a, mahni mualah United fan-te pawh an lungawi lo ṭan hle. Minute 26-naa Senne Lammens-a'n ball a man hnuah tlar hnung lamin box an chhuahsan har lutuk chu fan-te'n au chhuahpuiin chhuak vat turin an lo au chul a nih kha. Lammens pawh hian a ke hmanga ball pass sual neiin a buai hman ṭhelh a, Solanke-a shot a dan hnu pawhin a rilru a buai phah hle.
Second half ṭan aṭanga minute 8-naah Baleba chu warm-up nei tura tirhchhuah a nihin mipuiin kut an lo beng hluah hluah a. Carrick-a'n Baleba a luhtir dawn khan kut an inchibai a, Tielemans thlaka a luh meuh chuan khelmual chhunga mipui chuan ding meuhvin an lo lawm a ni. Kum 22 mi Baleba hian pressure hnuaiah ball inherpuiin Fernandes hnenah pass ṭha tak a pe nghal a, a tlan chakna leh tlar hnung venhim a thiamna chu a rawn pholang nghal a ni.
United hian Bryan Mbeumo-a mimal theihna ropui tak hmangin hma an hruai hlauh mai a, ani hian box chhungah hmunawl insiamin a kil sirah mawi takin a pet lut a ni. Spurs lamin chance ngah viau mah se an hlah hnem hle a, Rodrigo Bentancur hnawhchhuah a nih leh phei chuan an beidawng hman tep a ni. Mahse injury time-ah Dominic Solanke chuan Spurs tan goal a rawn khung hlauh a, De Zerbi-a naute chuan 1-1 in an tlip ta hram a ni.
Tielemans, Mainoo leh Fernandes te inkawp hian hna a thawk ṭha lo tih a chiang a, hetianga an khelh hian match 5-ah point 5 chauh an hmu a ni. Carrick hian Baleba-a fitness a la tawk lo ti mah se, second half-a a rawn luh dan aṭang khan a tawk tawh tih a lang chiang reng a, Atletico Madrid an hmachhawn hunah chuan Baleba hi a bul aṭanga a inlan ngei a ngai tawh dawn a ni.
