Manchester United chuan head coach thar an mamawh thut a nih chuan, Michael Carrick-a thlaktu atan Brighton manager Fabian Hurzeler chu an duh ber niin report a chhuak ta.

Kumin nipui bazar lai khan Carrick hian United-ah a nghetin contract a lo ziak tawh a. Mahse, Premier League match ruk an khelh hnuhnung bera vawikhat chauh hnehna an chan avangin, Old Trafford-ah hian Carrick-a lakah beiseina a chuai ṭan a, sawiselna pawh a tawk nasa chho hle a ni.

Season liam ta khan United chu Premier League-ah pathumna nihpuiin Champions League khel turin a hlangkai a, United board pawhin sum leh pai thlengin an thlawp ṭha hle. Mahse, 2026-27 campaign an ṭan dan erawh beisei a phak lo hle a, Red Devils te hi tun dinhmunah league table-ah 13-na ngawtah an tla thla mek a ni.

Hetiang a nih tak avang hian Carrick-a hmabak tur chungchangah rinhlelhna a piang ṭan a, United hian season lai hawla manager ban an ching ṭhin tih hriat a ni bawk. Kum 2024 October thla khan Erik ten Hag chu ban a lo ni tawh a, a thlaktu Ruben Amorim pawh 2026 kum tir khan ban a lo ni tawh bawk a nih kha.

Boruak a san chhoh viau laiin, United hotute hian Carrick hi thil siamṭha turin hun eng emaw chen an la pe rih tura ngaih a ni. Mahse, club thuneitute chuan kar thar lo awm turte aṭangin khelmuala hmasawnna hmuh ngei an phut tawh dawn a, October leh November thla tir inkhelte chu an season kal chhoh zel dan tur hriltu pawimawh a ni dawn a ni.

The Sun chanchinbu tarlan danin, United hotute chuan boruak kal mekte chu uluk takin an thlithlai a, Carrick thlak a ṭul a nih chuan Hurzeler hi an 'thlan hmasak ber' a ni ang. Nikum lam pawh khan Brighton boss hi Andoni Iraola leh Oliver Glasner te nen United enkawl thei tura ngaihven an lo ni tawh a ni.

Iraola chuan kumin nipui khan Arne Slot-a hmunruak luahin Liverpool a zawm a, Glasner pawhin Crystal Palace chhuahsanin Nottingham Forest a enkawl mek thung. United erawh chuan season liam ta khan Carrick-a'n Champions League a luhpui theih tak avangin a lakah rinna an nghat zui kha a ni a, mahse tunah chuan a thutlukna khan fiahna a hmachhawn leh ta a ni.

Brighton manager Hurzeler hian June thla liam ta khan kum thum daih contract thar a lo ziak tawh a. Chuvang chuan United-in lak an tum a nih ngat chuan zangnadawmna (compensation fee) tam tham tak an chawi a ngai dawn a ni. Brighton neitu Tony Bloom pawhin thla liam ta khan club dangin he German manager hi an ngaihven a nih pawhin 'eng dinhmun pawh hmachhawn turin an inpeih' thu a lo sawi tawh bawk.

Kum 2024-a Brighton a enkawl ṭan aṭang khan Hurzeler hian United lakah record ṭha tak a nei a, match ruk an inhmachhawn tawhah vawi li lai hnehna a chang tawh a ni. Chu mai bakah, Seagulls hi Premier League-ah a zawnin pariatna a nihpui thei bawk.

Hurzeler bakah hian Antonio Conte pawh United beisei zinga mi a ni a, Italian coach hi club nei lo a nih avangin English football-a kir leh a inhuam maithei a ni. Chelsea leh Tottenham boss hlui hi 2023 hnua Premier League la enkawl leh lo a ni. Hei bakah hian United hian Ipswich manager hlui Kieran McKenna leh Newcastle manager hlui Eddie Howe te pawh an dinhmun an thlithlai reng bawk niin report a tarlang a ni.