Manchester United-in nipui transfer bazar chhung khan striker emaw left-back emaw lo lalut ta se, club neitu Ineos leh Sir Jim Ratcliffe te chuan phurrit lian zawk an hmachhawn ngei a ngaih dawn thu The Athletic journalist Laurie Whitwell chuan Manchester United defender hlui Rio Ferdinand hnenah a sawifiah.
Kum 47 mi Ferdinand hian transfer bazar khar hmaa United-in left-back thar an mamawh ngawih ngawih nia mi sawi chu a pawmpui vek chiah loh thu a sawi a. Mahse Ineos hian tlarhma striker emaw full-back emaw lei theihna tur sum leh pai dinhmun an nei tawk em tih chu a hre chak hle a ni.
Whitwell-a tarlan danin, September thlaa transfer bazar khar hmain United hian player lak theihna tur sum leh pai kawng chu an hawng thei reng a. Mahse chutianga sum an seng belh a nih chuan, an sum hman leh lakluh dinhmun a inbalsak theih nan nakkumah Champions League khel tura tlin ngei ngei ngaihna dinhmun rit tak hnuaiah an innamlut dawn tihna a ni thung.
'Rio Ferdinand Presents' podcast-a an inkawmnaah Whitwell chuan, "Player chu an la thei ngei a, mahse chutiang ti ta se Champions League khel tura tlin ngei ngei ngaihna dinhmunah a nawr lut leh dawn a ni. Thil engkimah phurrit a belhchhah dawn tihna a ni. Credit hmanga sum hman theih an neih avangin pawisa chu an nei tih chu a dik mai thei e. Revolving credit facility aṭanga £200million ka sawi bakah, cash-in £60m vel an nei bawk a. Mahse heng zawng zawng piah lamah hian financial regulation (sum leh pai inawpna dan) hi ngaihtuah tel a ngai tlat a ni," tiin a sawi.
Whitwell chuan Premier League-a sum leh pai dan lamah chuan United hi buai lutuk lo tura ngaih an nih laiin, UEFA dan khauh zawk erawh an pel ṭep dawn tih a tarlang bawk. Premier League inkaihhruaina dan chu a zalen deuh zawk a, an sum lakluh aṭanga zaa 85 (85%) chu transfer fees leh hlawh atan squad-ah an hmang thei a ni. Mahse UEFA dan erawh a khauh zawk hle a, squad tana sum hman theih chin hi zaa 70 (70%) chiah a nih bakah club sum hloh zat (losses) thlengin an vawng uluk hle a ni.
Old Trafford-ah hian head coach Michael Carrick-a hnuaiah season liam ta khan United hi pathumna an nih avangin, tun season hian Europe inelna sang Champions League-ah an kir leh tawh a. May thlaa Manchester Evening News-in a tarlan dan chuan, Champions League-a an inlan leh theih avang hian broadcast revenue leh ticket hralhna te aṭangin United hian £100m thleng an hmu chhuak thei a ni. Red Devils hian thla liam ta khan Champions League match hmasa ber khel tawhin, Old Trafford-ah Azerbaijan club Sabah chu 4-0 ngawtin an lo sawp tawh a ni.
