Manchester United chuan Elland Road-ah Leeds United chu 1-1 in an inhnehtawkpui a, inelna hrang hranga chak nei lova an kal tluang lai chu titawp thei lovin, an match rukna atan chak nei lovin an inkhel leh ta a ni.

He Premier League inkhelah hian Michael Carrick-a naute hian bul an ṭan ṭha hle a, minute 35-naah Bryan Mbeumo chuan goal khungin United hi hma a hruaipui a. Mahse, second half minute 51-naah Leeds striker Dominic Calvert-Lewin chuan mualneitu tan siphurh a rawn rul a. Team pahnihte hian chakna goal khung tumin nawr ve ve mah se, 1-1 a inhnehtawkin point khat ve ve an insem ta zawk a ni.

Match zawhah Calvert-Lewin chuan Sky Sports hnenah thu sawiin, United hian an khelh dan phung (formation) mil tura an khelh dan an rawn thlak chu mak a tih lem loh thu a sawichhuak a. Leeds tana theihna sang zawk lantir ni se chuan United tan dinhmun a chhe lehzual thei hial niin a sawi bawk.

United khelh dan chungchang sawiin Calvert-Lewin chuan, "Keimahni mil tawk turin formation siamrem an rawn tum a. Season liam taa thil thleng en kha chuan mak ka ti hran lo. Kan taksa chakna leh kan khelh dan phung te kha an thlir a, man-for-man a min nawr kha an tum a ni maithei. Insiamrem nan hun tlem chu kan mamawh ngei mai, mahse insiamrem chu thil harsa lutuk a ni lo. Final third-ah theihna kan pholang tawk lo zawk a ni," tiin a sawi.

Striker hian an khelh dan sawi chhunzawmin, "Final third-ah khan a aia ṭha zawka kan khelh theih ka ring a, a bikin first half-ah khan. Penalty box chhungah ball ṭha kan vawrh lut ṭhin a, mahse a lo changtu kan tlem deuh a ni. Second half-ah erawh inrintawkna sang zawk nen hma lam kan nawr a. He match-ah hian chak lo zawk kan ni hi kan vanneih loh vang a ni," tiin a sawi bawk.

Season liam taa Old Trafford-a an inhmachhawn ṭum pawh khan Leeds United hi 2-1 in an lo chak tawh a, khami ṭum khan Noah Okafor-a'n goal hnih a khung a, United tan Casemiro-a'n goal khat a khung ve thung a nih kha.

He inhnehtawkna result hian Premier League table-ah Manchester United chu 13-na dinhmunah a namthla a, tun season league match pasarih an khelh tawhah vawikhat chiah hnehna an la chang a ni. Carrick-a naute hian Nilaini tlaiah Como lakah khualmualah Champions League match an khel chhunzawm leh ang.