Manchester United centre-back Harry Maguire chuan Elland Road-a Leeds United nen 1-1 a an inhnehtawk hnuah, an team khelh dan leh an rilru puthmang chungchang a sawichhuak.

He inkhelah hian first half-ah Bryan Mbeumo-a'n goal khungin United hi hma a hruaipui a, mahse chawlhlawk hnu lawkah Dominic Calvert-Lewin chuan Leeds tan an siphurh a rawn sut a ni. United hian goal thun tumin vawi 13 zet shot nei mah se, goal zawnah vawi thum chauh an pet thei a ni.

Inkhelh zawhah Sky Sports hnenah Maguire chuan, "Team inpumkhatna te, kan rilru puthmang leh kan ṭangho zia hi chu tuman an sawisel thei lo ang. Elland Road hi khualmual tana tlawh huphurhawm tak a ni a, Leeds pawh league-ah an che ṭha em em reng bawk a ni. Mahse, hei aia ṭha hian kan khel thei a, ball kan chan laiin kan theihna sang zawk kan phochhuah a ngai a ni," tiin a sawi.

England defender tawn hriat ngah hian set-piece aṭanga goal an chhuah danah a lungawi loh thu a thup lo hle a. Set-piece an dan tumnaah Noussair Mazraoui chuan Calvert-Lewin chu a hnaih tawk loh avangin Leeds striker hian awlsam takin goal-ah a chantir zui ta a ni.

Hemi chungchang sawiin Maguire chuan, "Hetiang hmun khirhah hian set-piece aṭangin i tlawm tur a ni lo, mahse set-piece aṭang bawkin goal kan chhuah a, chu chuan inkhelah a rawn luttir leh ta a ni. Inkhelh chhung zawng khan kan team dinhmun (shape)-ah khan kan hahdam tawk hle a, chance tam tak min siamsak thei bik lo. Mahse, half-time hnu lawka set-piece aṭanga goal chhuah leh mai erawh a beidawnthlak hle. Chutih rualin theih tawp chhuaha kan ṭan a ngai a ni.

"Minute 70 vel aṭang khan inkhel kan thunun chho leh a, chak zawk nih theihna chance pawh kan nei sang zawk hialin a lang, mahse inhnehtawka point khat ve ve insem hi a phu tawk chiah niin a lang," tiin a sawi bawk.

Tun hnaia Manchester United chet dan thlirin khualmual Elland Road-a draw neih hi result chhe lutuk a ni lo maithei. Mahse, a pumpui thuah chuan he result hi United tan a tawk zo meuh lo a ni. Michael Carrick-a enkawl Manchester United hian league match sarih an khelh tawhah point sarih chauh an la hmu a, August thla hnu lamah Premier League-ah hnehna an la chang leh miah lo thung.

He inkhela point khat an hmuh hian head coach Carrick-a chunga pressure awm sa chu a tizual lo maithei e, mahse a kian phah chuang hauh lo thung a ni.