Manchester United tan tun season bul ṭan dan chu a ṭha lo chho hle a, Manchester derby-a an tlawm hnuah Nilaini zan khan Carabao Cup third round-ah Brighton lakah 3-2 a tlawmin inelna an chhuahsan zui leh bawk a ni.
Khelmuala an chet chhiat bakah hian United chuan khelmual pawn lamah pawh buaina an tawk mek a. An academy player theihna ngah tak kum 15 mi JJ Gabriel chuan kumin October thlaa kum 16 a tlin huna Europe club dang a pan theih nan a contract pawtthler (torn up) turin a ngen a ni. Brighton an hmachhawn hma hian Gabriel hi matchday squad-a telh tura beisei a nih laiin, chhuah a ngen zui a, kar tluanin training a zawm duh lo bawk a ni. Naupang kum tling lo la nih miau avangin manager Michael Carrick pawhin he thil hi fimkhur takin a dawngsawng a ni.
Gabriel leh a pain buaina an siam mek lai hian, United academy chhuak dang pakhat erawh chuan dawhthei taka hun a nghah hnuah hunṭha a hmuh chu a chhawr ṭangkai hle thung. Chu player chu Nilaini zana Brighton laka goal khungtu Shea Lacey hi a ni.
Carrick-a hnuaia a vawikhat nan bul ṭantu Lacey hi khelmualah a che ṭha ber pawl a ni a, hmahruaina goal khung bakah dinglam sir (right wing) aṭangin Brighton tlarhnung a chhaih buai hle a ni. Brighton laka a khelh dan chungchangah Sky Sports-in an kawmnaah Carrick chuan he rawlthar hi fak hle in, hmasawn zel duhna leh theihna sang tak nei a nih thu a sawi chhuak a ni.
Carrick chuan first-team-a inlan tur hian Lacey pawhin dawhthei taka hun a nghah ve tho a ngaih thu sawiin, Gabriel chauh hi nghak tura hrilh a nih loh zia a tarlang tel bawk.
Carrick chuan, "Shea khan a vawikhat nan bul a ṭan a, goal a khung nghal a ni. Tlangval ṭha leh ropui tak a ni a, thil tihdan tur dik takin a ti vek ṭhin. Khelh ṭhat a duh a, thil thar zir a inhuam em em bawk. A hun ṭha a lo thlen hma chu dawhthei takin a nghak a ni," tiin a sawi.
Carrick chuan sawi zawmin: "A lo inpeih sa thlap a, hun remchang a rawn inher chhuah khan theihna zawng zawng a phawrh nghal a ni. Hetiang hun hi academy anga kan lo nghahhlelh em em leh, hetiang hmuh theih nana thawkrim ṭhin kan nih chhan chu a ni reng a ni. Football hi a inthlak danglam reng a, a ṭhang lian zel a ni. Academy pawh an inthlak a, an ṭhang chho bawk. Player naupang zawk leh senior player te pawh an danglam zung zung a, insiamrem zel a ngai a, chu chu inkhelh ziarang ve reng a ni," a ti bawk.
Carrick-a thusawi hi a hun boruak thlirin JJ Gabriel-a hnena thuchah hrilh rukna ang pawha ngaih theih a ni. Gabriel-a'n a chhuahsan a nih pawhin academy chuan thil thar an hmachhawn ang a, chu chuan player dangte hnenah first team luh theihna leh lansarh theihna kawngka a hawnsak zawk dawn a ni.
Fulham lakah Lacey hian inkhelh hun a chang chhunzawm dawn em tih chu hriat a la ni lo na a, Brighton laka a chet ṭhat dan ngaihtuah chuan khelmual rah leh ngei chu a phu hle tih a chiang a ni.
