Manchester United midfielder hlui Scott McTominay chu Real Madrid lakluh theih tura ngaihven zinga mi a nih thu sawi chhoh mek a ni a, hetiang thil a thleng a nih chuan United manager hlui Jose Mourinho nena thawhdun leh theihna hun remchang a nei dawn a ni. Old Trafford a chhuahsan hnu hian he Scotland international hian a theihna sang tak a pholang chhunzawm zel a ni.
Kum 2024 nipui bazar chhung khan McTominay hian £25.9million manin Serie A club Napoli a zawm a. Italian club tharah hian player pawimawh berte zinga mi niin bul a ṭan nghal a, a season hmasa berah Serie A title nomawi chawipuiin hlawhtlinna lian tak a hmachhawnpui nghal a ni.
Hetianga a chet ṭhat em avang hian a hmabak chungchangah sawi a tam chho hle a, man to taka club lian zawka insawn theihna a neih thu chanchinbu hrang hrangin an tarlang a. Italy rama report ṭhenkhat chuan Real Madrid pawhin he player dinhmun leh lakchhuah theih dan hi an ngaihven tawh niin an tarlang hial a ni.
Manchester United forward hlui Louis Saha pawhin Spanish club lian hian McTominay hi an lalut thei a nih chuan thil ropui tak a nih tur thu a sawichhuak a. BettingLounge hnenah Saha chuan, "Scott McTominay-a'n Manchester United a chhuahsan kha chu thil liam tawh a ni a, mahse ani kha player ropui tak, United-in an hlutna an hmuh thiam tawk loh a ni," tiin a sawi.
Saha chuan sawi zawmin, "United khan a theihna sang ber an phawrhchhuahsak thei lo a, hei hi club hian kum tam tak chhung tihsual an lo neih fo tawh ṭhin kha a ni. Khawi hmunah pawh khel thei khawpa theihna nei ṭha a ni a, Real Madrid pawh a huam a, Jude Bellingham-a nena an inkawp dun tur phei chu hmuh a chakawm ngawt ang. An khelh dan phung a inang tlang hle a, McTominay hian dinhmun sang berah a theihna a lantir tawh bawk a, Scotland tan pawh thil ropui tak a ni bawk ang," a ti.
Transfer window lo awm turah hian hetiang inleina hi a thleng a nih ngat chuan, United tan pawh sum lama hlawkna beisei theih a awm dawn a ni. Old Trafford an chhuahsan khan Napoli hnen aṭangin sell-on clause an zep tel a, hemi ang hian Napoli-in a man an hmuh aṭanga zaa 10 (10%) chu United hian an dawng tel ve thei dawn a ni.
Real Madrid hi McTominay-a manager hlui Mourinho-a enkawl lai a ni a. Portugal coach hnuaiah hian he Scottish midfielder hian United tan match 31 lai a lo khel tawh a ni. Hliam leh hriselna lama buaina tenau avangin chawlh a neih zawk hnuah inkhel turin a inpeih leh tawh a, Frosinone 3-0 a an hneh ṭumin second-half substitute-in a lut a, Villarreal nena Champions League inkhelah leh Venezia laka Serie A match-ah bul a ṭan zui bawk a ni.
