Manchester United Women-in an head coach atana Eva Olid an lak chhan lian tak pakhat chu rawlthar zawk leh academy naupangte chhawr a ngam vang a ni a, he a rinna hian tunah chuan rah ṭha a chhuah chho mek zel a ni.
Nimin khan Players' Cup match-ah United Women chuan Durham chu 5-1 ngawta an sawp ṭumin, match a tawp meuh chuan an academy chhuak ngawt mi paruk zet mual chhungah an inlan hman a. He inkhelah hian rawlthar Lucy Newell chuan a debut match a khel a, Mared Griffiths-i'n goal a khung bawk a ni. Chu mai bakah, an chakna goal khung kawngah Jessica Simpson, Jess Anderson leh Layla Drury te pawhin thawhhlawk takin hmun pawimawh an luah ṭheuh bawk a ni.
Hei hi academy tan chuan chhuanawm tak a nih rualin, Manchester United Women fan-te thil hmuh chak em em ṭhin a ni bawk. An coach hlui Marc Skinner-a hun lai khan hetianga squad enkawlna kawnga naupangte chhawr lam hi hlamchhiah deuhva hriat a nih ṭhin avangin, tun boruak thar hi thil lawmawm tak a tling a ni.
First team lama naupang zawkte'n khelhna hun remchang an hmuh tam tak avang hian, ram aiawha khel tura koh an ni chho zel pawh hi thil mak a ni hran lo reng a ni. Club official website thuchhuah chuan, "Manchester United Women rawlthar pali chu age category hnih hrangah England ram tana khel turin koh an ni," tiin a puangzar a ni.
Kar liam taa Sheffield United an hmachhawn ṭuma corner kick aṭanga mawi lutuka goal khungtu (olimpico goal khungtu) Jess Simpson chu England under-23 squad-ah koh a ni a. Anni hian October ni 12 hian York khawpuiah Norway an tum dawn a ni.
Simpson-i bakah hian England under-19 squad-ah United player pathum dang an tel bawk a. Club thuchhuah chuan, "Evie Mitchell, Lucy Robinson leh Jessica Anderson te chu international break chhung hian England Under-19 squad fin turin an inpuahchah a ni," tiin a tarlang bawk. England Under-19 team hian he chawlhkar chhung hian Denmark, Switzerland leh Bosnia & Herzegovina te chu an hmachhawn dawn a ni.
United chuan ram aiawh tura mawhphurhna lian tak la tur an player naupang palite chu duhsakna sang ber an hlan a, ram tana che ṭha tura an beisei thu an sawi zui bawk a ni.
