Kar liam ta mai khan Manchester United academy rawlthar theihna ngah tak JJ Gabriel chuan Old Trafford chhuahsan a duh thu a puang chhuak thut a, hei hian club hotute leh United ṭantute a ti-bangbo takzet a ni. A chhan pawh he thu a puan chhuah hun hi Brighton laka a debut siam tura beisei a nih hma darkar tlemtea thleng a ni a; chu mai bakah, UEFA Youth League-a Sabah laka hat-trick a khung hnu lawk, a team-mate leh coach-te bula hlim taka a awm hnu chiah a ni bawk.

Gabriel-a lungawi lohna bulpui ber chu kum 15 chauh la ni chungin senior first-team-ah khelhna hun ṭha a chang tawk lo nia a inhriat vang a ni a. Mahse, United tan inelna tak takah match ruk chauh khel thei dinhmunah a la ding a ni. Hetiang a nih lai hian, a thil tum ber chu Barcelona pan a nih hmel a, mahse he rawlthar hian Catalan club-ah hian kawng awlsam zawk leh first-team luhna hun ṭha zawk a hmu tak tak dawn em tih chu zawhna lian tak a tling chho mek a ni.

Tun dinhmunah chuan Manchester United first-team theihna leh nihphung chu Barcelona nena khaikhin chuan a la hniam hle a. Chu vang tak reng chuan United pawh hian Gabriel hi cup competition-ah khelhtir an rilruk a, first-team tana chhawr theih a nih an beisei a ni. Mahse Barcelona lamah erawh Gabriel hian senior team luh theih nan elpui khirh tak tak a hmachhawn a ngai dawn thung a ni.

Barcelona squad-ah hian mual veilam leh attacking midfield position-ah Raphinha, Anthony Gordon, Fermin Lopez, Jesse Biwisu leh Toni Fernandez te ang player ṭha leh to tak tak an awm sa teuh a. Heng player-te hi an man a toin, a nih loh pawhin taksa leh tha lamah senior football khel tura inpeih tawh tak tak an ni a. Hetiang dinhmun a nih avang hian Gabriel hi Barcelona reserve team aia sangah a inlan nghal a rinawm loh hle a, chu chu United-a a dinhmun nen a inang reng dawn tihna a ni a, a khelh tlem vanga a phun chhan pawh hian awmzia a nei lo nghal vek thei a ni.

Hei bakah hian Fabrizio Romano tarlan danin, Barcelona chuan Gabriel-a khelhna position-a khel tho, kum 16 mi Dany Freire chu lakluh an inrempui fel leh tawh bawk. Freire hi Gabriel aia sang zawk, tlan chak zawk leh taksa pawh inpeih zawk a ni.

Thil lian tham tak a inthlak danglam a nih loh chuan, Gabriel hian winger pangngai angin hmun a chang zo dawn lo a, tlarhma laili (attacking midfield)-ah sawn luh a ngai maithei a ni. Barcelona mai bakah Real Madrid pawhin ngaihven ve bawk mah se, Gabriel tan chuan heng club liante pan hi hmasawnna kawng bumboh tak a ni ngei ang. United-in an en hran bik leh duat taka an chhawmdawl laiin, Barcelona-ah erawh player tam tak zinga pakhat (a number) ve mai a ni thei dawn a ni.

A career tana ṭha ber tur chu United-ah puitlin chhoh a, season tlemte chhung first-team-ah khelh tam a, nakina Barcelona-in an la duh cheu a nih pawha £100m man player anga luhpui zawk chu a fuh zawk ngei ang. United-a a hma hun duhawm tak awmsa chu Barcelona-a boruak chiang lo tak avanga a paihthlak mai hi thil pawi tak a tling thei a ni.