Manchester United chuan tun season bul an ṭan ṭha lo hle a, head coach Michael Carrick pawhin sawiselna leh nawrna (pressure) lian tak a hmachhawn mek a ni. United hian Carrick-a'n mawhphurhna a lak tirh laia Champions League khel tura an tlin theih nana an theihna pho chhuah ṭhin ang kha an pholang leh thei tawh meuh lo a ni.
United midfielder hlui Carrick hian January thla khan Old Trafford hi a zawm nawn leh a, a tirah chuan point table-ah hma a sawnpui chak hle. Mahse tun season thar inṭan tirh lamah erawh an boruak ṭha a reh chho tial tial a; tlar laili thuam chak nan Carlos Baleba, Youri Tielemans leh Andrey Santos te sum tam tak senga an la lut tawh chung pawhin beisei an phak lo a ni.
United an khelh chhiat chhoh tak zelah hian, club legend Nicky Butt chuan kum 2025-a Middlesbrough aṭanga Carrick-a an ban hnu khan, manager hna chelh leh a chak tawh loh thu a lo hrilh tawh nia sawiin thuthang a tichhuak a. Mahse he thu hi United boss Carrick chuan a pha nghal vat thung.
'The Good, The Bad and The Football' podcast-ah Butt chuan sawiin: "Michael-a'n Man United hna a lak hmain ka bula a awm laiin management chungchang ka sawipui a. Ani chuan, 'Aih, ka ti tawh lovang, a hahthlak lutuk. Ka lu a buai nuaih mai. Hna lian tham (big job) a nih ngawt loh chuan ka thawk tawh lo ang,' a ti a. Chu hna lian chu Man United hi a ni," tiin a sawi chhuak a ni.
He thu hi press conference-ah an zawh chuan, United manager Carrick chuan chhangletin: "Chutiang chu ni se helai hmunah hian ka awm miah lovang, a dik em? Tun dinhmunah chuan, hei hi ka tana hna ṭha ber leh mawhphurhna ropui ber ka chelh theih a ni. He dinhmun luah hi thil hlu tak leh mawhphurhna lian takah ka ngai a, hemi rual hian helai hmuna danglamna siam a, hlawhtlinna chan duhna phurna nasa tak ka nei bawk a ni," a ti nghet charh.
Hemi bakah hian Amazon Prime documentary 'All or Nothing' buatsaih mekin United dressing room boruak a tichhe hle nia sawi a awm bawk. Arsenal, Manchester City leh Tottenham te hnuah United chu he series-a inlan leh tur an ni a. The Sun thuchhuah chuan, camera crew an awm reng avangin inkhelh zawha team inhrilhfiahna (debrief) an neih hunah player-ten tlang taka an rilru sawichhuak ngam lovin an insum ṭhin nia sawiin, hei hian khelmuala an chet chhiatnaah nghawng a nei niin an tarlang.
He documentary chungchang hi August thlaa an zawh ṭum khan Carrick chuan: "A ṭha vek alawm. A tharin a danglam deuh tih chu a chiang a, mahse nitina kan hnathawhnaah chuan camera a tam ṭhin hrim hrim avangin naupangte pawh an tlangnel tawh hrim hrim a ni. Kan pal tlang zel a ngai a, camera-ho pawhin min zahthiam hle. Puanlam aṭanga thlirtute tan chuan a lian hmel viau ang a, mahse nitina a chhunga kan awm chhung chuan chutianga buaithlak a ni lo," tiin a lo sawi tawh a ni.
