Pathianni chawhnu khan The Valley mualah Manchester United Women chuan Charlton Athletic chu 3-1 in an hneh a, Women’s Super League (WSL)-ah a zawnin vawi thum hnehna an chang ta a ni.

He hnehna an chan tak avang hian inelna hrang hrang chhiarin United Women hian a zawnin match nga ngawt chak tluang zatin record ṭha tak an nei chhunzawm bawk.

Inkhelh tir phat aṭangin United lamin mual an thunun nghal hle a, first-half chhung ngeiin goal thum ngawt an khung hman a ni. United tana goal thuntu te chu Ella Toone, Andrea Medina leh Julia Zigiotti te an ni a. A bik takin Ella Toone-i tan chuan he inkhel hi a hlu zual hle a, league match-ah hun rei tak chhung goal khung lovin a lo khawhral tawh hnuah, Charlton lakah hian goal pawimawh tak a khung leh ta a ni.

United manager Eva Olid chuan ram tana inkhelh chawlh (international break) a awm hmaa Liverpool laka 1-0 a an chak ṭuma a player chhawr (starting XI) ngai chiah kha khelmualah a luhtir nawn leh a. Tlarhma attacking unit-a Jess Park, Ella Toone, Andrea Medina leh Elisabeth Terland te lakah rinna a nghat zui zel a, chu a thutlukna chu phuhrukin mikhual team United hian point thum hlu tak an hlawhchhuak ta a ni.