Champions League inkhela Atletico Madrid laka 2-0 a Manchester United an tlawm hnuah, Lisandro Martinez chuan club hotute thiltum neih tlem zia phawrhchhuakin director of football Jason Wilcox chu a bei zui hrep a. Mahse, hetianga United chu Champions League club a ni lo anga a sawi hi a dik lo tih Merson-a chuan a lo chhang let ve thung a ni.

Martinez hian kumin nipui transfer bazara United chet dan chu a sawisel a, Wilcox chu player lakluh lamah ṭan a la tawk lo tiin, "Tun dinhmunah chuan team lian dangte nena tehkhin chuan squad ṭha ber kan nei lo a ni," a ti. Chu mai bakah an team chu inrintawkna ("belief") leh chakna thahruai ("energy") an nei lo a, an inzawmkhawm ṭha tawk lo niin a sawi bawk.

Riyadh Air Metropolitano muala inkhelh zawha Prime Video hnenah thinrim tak chunga Martinez-a'n thu a sawinaah: "Khelh chhiat thlak tak a ni, a chhe takzet. Ka inbengdaih hram hram a ngai a ni. Mahse a chang chuan hei hi tun dinhmuna kan club dinhmun darthlalang chu a ni ṭhin. Season liam ta kha chu a ropui ngei mai, mahse tunah chuan a chung ber aṭangin kan hla tawh hle a ni. Inel pha tur chuan player kan lak belh a ngai. Atletico hi en ula, team ṭha tak an nei a, chak pawh an phu reng a ni," tiin a sawi.

Sawi chhunzawmin: "Mitin lakah beisei ka nei sang zual a ni. Sum tam zawk thehchhuah (investment) maw? Aw, zaa za (100%) in ka pawm. Ka tlang takin ka sawi mai ang, kan technical director lakah pawh beisei ka nei sang zual hle a ni. Player kan nih ang pawhin thil tam zawk kan tih a ngai a, mahse hetiang zan tana inpeih tur hian squad chak ṭha tak din a pawimawh bawk. Season liam ta khan team ṭha tak din theihna tur lungphum kan phum a, mahse ka tlang takin ka sawi mai ang, ka team nena hetiang hmun rawn pana result ṭha beisei miah lo ang maia kan khel hi a thinrimthlak takzet a ni," a ti.

Head coach Michael Carrick chu kumin nipui bazarah squad thuamchak nan sum pek a nih tawk leh tawk loh chungchang an zawhna chu chhangin: "Ka ring chiah lo. A theih tawp chu a chhuah ve ngei a, mahse season tin a inang lo. Team dangten i khelh dan leh engkim an hre vek tawh a. Season tin i inthlak danglam lo a nih chuan buaina lian tak a ni. Manager thlak thlak thlak reng hi a tawk em ni? Hmun dang ve thung le? Sawi thui vak ka duh lo. Coach dem chu a awlsam a, player-te dem pawh a awlsam, mahse hmun dang ve thung le?" a ti zui bawk.

Arsenal star hlui Paul Merson chuan Sky Sports-ah he Argentine defender thusawi hi chhang letin: "Technical director-ten player an lalut ṭhin ngei mai. Mahse khelmuala i chhuah tawh chuan i khel ṭha tur a ni. Khelmual box chhungah khan Solanke-a lo chhuahpalhtu kha amah [Martinez] ngei hi a nih kha. Professional footballer aṭangin hetiang ṭawngkam hi ka la hre ngai lo. United chu Champions League club an ni lo a ti maw? Khawvel football-ah club lian ber zinga mi an ni asin. Hetiang hi sawi theih a ni lo. He Champions League-ah hian Manchester United aia club te zawk tam tak an khel reng alawm," a ti ve thung.

Martinez-a thusawi hian United chhungah buaina lian a siam zui niin tarlan a ni a. Manchester pana an thlawh kir leh laiin United player pakhat tal chuan a hmaah he a thusawi hi chona a siamsak niin an sawi a, boruak a rit hle a ni. Squad-a player ṭhenkhat chu an club thiante chu sang tak thleng pha tura ṭha tawk lo anga a sawi avangin an lungawi lo hle a, squad chhungah inlungrual lohna (split) a chhuah phah hial niin hriat a ni bawk. Martinez hian club dan bawhchhiat avangin disciplinary action a hmachhawn maithei bawk a ni.

He thil thleng chungchang hian United boss Carrick chuan: "Ka la hmu ve lo. Kan beidawng a, a chang chuan a rilru a thawk thut ṭhin a ni. Ka la hmu lo a, tunah hian sawi zui vak hun a nih pawh ka ring lo. Kan vaiin club hi kan ngaihtuah vek tih ka hria a, chu chu kawng hrang hrangin kan lantir ṭhin. Mahse tun dinhmun hi chu kan inpumkhat a, kan ṭan rual a ṭul hun lai tak a ni. Pathianni hian match lian kan nei a, chumi atan chuan ṭha taka kan inbuatsaih a ngai a ni," tiin a sawi ve bawk.