Manchester United defender hlui Gary Pallister chuan United chu centre-back ke veilam hmang thiam emaw, ke dinglam hmang thiam emaw inkawprem dan (balance) ngawt buaipui lutuk lovin, an defender ṭha ber berte chhawr zawk tura thutlukna siam turin a ngen.

Gambler Media buatsaiha The Peoples Person nena an inkawmnaah, he defender ropui hian ke dinglam hmang ni chunga a career laia tlarhnung veilama a lo khelh ṭhin tawnhriatte chu a tarlang a ni. Pallister hian Old Trafford-ah season kua ngawt hun a lo hmang tawh a, Premier League title pali bakah nomawi lian tham eng emaw zat a lo chawipui tawh a ni.

He thu hi tun dinhmuna United squad tan pawh thil pawimawh tak a ni a. Harry Maguire, Matthijs de Ligt leh Leny Yoro te chu mual dinglam centre-back tura ngaih an nih laiin, Lisandro Martinez leh Ayden Heaven te erawh ke veilam hmang thiam an nih avangin tlarhnung veilamah rem zawk tura ngaih an ni thung. Amaherawhchu, Maguire pawh hian a hmain Victor Lindelof-a kawppui niin veilamah hian a lo khel fo tawh a, Pallister-a ngaihdan chuan ke dinglam hmang defender ṭha tan chuan hetianga insiamrem hi thil harsa a ni miah lo.

Player lakluh kawngah pawh he thil hi sawi zui a hlawh hle a, Everton defender Jarrad Branthwaite pawh veilam tlarhnung thuamchak thei tura ngaihin United nen sawizawm a ni leh tawh bawk a ni. Mahse Pallister chuan tlarhnung balance ṭha neih chu thil duhawm tak ni mah se, player form ṭha, theihna leh rintlakna aia dah pawimawh hmasak tur a ni chuang lo tih a sawi chhuak a ni.

"Thil famkim thlir chuan ke veilam hmang centre-back neih chu a duhawm ngei mai," tiin Pallister chuan a sawi a. "Mahse ka career chhung zawng deuhthaw khan ke dinglam hmang chungin tlarhnung veilamah ka khel ṭhin. Thil famkimah chuan tlarhnung balance kha en a nuam a, veilam centre-back tan pawh pawn lam pan a, line hrula ball theh chhuah a awlsam zawk a, balance ṭha tak a pe ṭhin a ni."

Mahse manager-te tan hetiang balance neih hi thil tul tawpkhawk a nih leh nih loh an zawhna chhangin Pallister chuan, "Neih ngei ngei ngai a ni kher lo. Manager tin hian ke veilam hmang centre-back ṭha tak neih chu nuam an ti vek ang tih ka hria, mahse a ṭha tak tak zawn chhuah hi a harsa em em a ni. Centre-back ṭha tak i hmuh theih phawt chuan, ke dinglam hmang pawh nise veilama a khelh hian ka pawiti miah lo," a ti.

Head coach Michael Carrick-a ngaihtuahna chungchang sawi zuiin Pallister chuan, "Hei hian Michael Carrick-a ngaihtuahnaah hmun tlem a luah em tih chu ka hre lo, mahse ani chuan thildang zawng aiin 'Tu nge ka defender ṭha berte?' tih a ngaihtuah berin ka ring. Manager ṭhenkhat chuan ke veilam hmang centre-back chu an position dik taka dah hram hram an tum ṭhin a, mahse ka tan chuan neih ngei ngei ngai a ni lo. Centre-back ṭha tak i kawl a nih chuan, a insiamrem thei mai a ni," a ti bawk.

A tawp nan khelmual dinhmun sawiin, "Tunlaiah chuan khelmualte hi a ṭha tawh em em a. Kan hunlai ai khan tlarhnung aṭanga ball nena nawr chhuah (play out from the back) pawh hi a awlsam zawk fe tawh a ni. Keima ngaihdan chuan i centre-back form ṭha ber leh ṭha bera i ngaih pahnihte kha khelmualah chhuah tawp mai tur a ni," tiin a ngaihdan a sawi bawk a ni.