Manchester United head coach Michael Carrick chuan kumin nipui bazara Brighton aṭanga an lakluh Carlos Baleba chu a dinhmun a ṭha chho hle tih a nemnghet a, Pathianni tlai dar 4:30-a Craven Cottage-a Fulham an hmachhawn hunah United tana a match hmasaber (debut) a khelh theih a beiseiawm ta hle.
Kum 22 mi Cameroon international hi kumin nipui bazar chhung khan £65million bakah add-ons £5million sengin Old Trafford club hian an lalut fel a nih kha. Casemiro-a'n a contract zawh vanga club a chhuahsan hnu leh, Uruguay tana World Cup a khelhna lama Manuel Ugarte-a'n khup hliam na tak a tawrh tak avangin United hian tlar laili thuam chak an mamawh em em a ni.
United hian Chelsea aṭangin Andrey Santos an la tawh a, Aston Villa aṭangin Youri Tielemans an la bawk a. Hemi hnu hian Brighton-in a man an tihhniam tak avangin Baleba hi an la lut leh ta a ni. Season liam ta khan a khelh dan phung a tlahniam deuh hlek a, mahse thla 12 liam ta aṭanga an lo ngaihven tawh player hi man tlawm zawk fêa an lalut thei chu United hotute chuan an hlawkpui hle niin an hria a ni.
Pre-season an neih laia a kerek hliam (ankle ligament injury) a tawrh avangin Baleba hian Red Devils tan hian minute khat pawh a la khel lo a. Mahse, club website kaltlangin MUTV hnenah Carrick chuan he midfielder dinhmun hi a ṭha chho hle tih a tarlang ta a ni.
Carrick chuan, "Kan dinhmun a ṭha chho hle a, mi zawng zawng pawh an inpeih thlap e. Kar liam ta chhung khan player tam zawk chu an khel vek tawh a, an fit ṭha a, Carlos pawh squad-ah seng luh leh kan tum mek a ni. Seng luh leh han tihah, squad zinga inhriattir chhoh a ni ber mai. Chuvangin tun kar chhung khan training tlem a nei tawh a, beiseina nei chungin tun kar chhung hian Luke [Shaw] pawh a rawn tel ve theih kan beisei a, kar tawpa inkhel hmuhnawm tak hmachhawn turin kan inbuatsaih mek a ni," tiin a sawi.
Baleba hi khelmuala United kawr ha chunga inlan hlan a nghakhlel tawh hle tih a chiang a, Carrick pawhin a phur zia hi a fak nawn leh a ni. Carrick chuan sawi zawmin, "A ni khawp mai, khelmuala luh vat vat a chak tawh lutuk a, a phur kual vel hle a ni. Club thara i luh tirha group leh training-a i la tel ve theih mai loh hian thil a awlsam lo ṭhin reng a ni. Mahse, ani chu a puitling hle a, a tuar chhuak thiam khawp mai. Mize ṭha tak a nei a, a phur sarh reng a, rang thei ang bera rawn kir leh vat tumin a ṭan nasa hle bawk. Chuvangin kan kianga a rawn awm leh thei hi thil lawmawm tak a ni," a ti bawk.
Kar hnih khat liam ta chhung khan Manchester United hian match an hmang ṭha lo hle a, chuvang chuan kar tawpah hian hnehna chan ngei an mamawh takzet a ni. Everton mualah stoppage-time-ah goal an chhuah avangin an inhnehtawk a, Manchester derby-ah pawh City-in player 10 chauh an nei chungin goal pawm tlak loh hmangin an hneh lo bawk a nih kha.
Nilaini zan khan Carrick-a naute hian mahni mualah goal hnih laia hma an hruai hnuin, Brighton lakah 3-2 in an tlawm zui leh a, a zawnin season hnih chhung chu League Cup hmasa berah an tla nawn leh ta a ni. United hian khelmualah an manager thar, Real Madrid player leh manager hlui Alvaro Arbeloa-a hnuaia league-a la chak lo Fulham an hmachhawn dawn a ni.
