Manchester United captain hlui, kum 33 mi Harry Maguire chuan a football zinkawnga a hmachhawn tawh zinga striker beih harsa a tih ber chu Bayern Munich leh England forward Harry Kane a nih thu a sawichhuak a. He ngaihdan hi a club-pui Luke Shaw leh Lisandro Martinez ten he striker ropui chungchang an lo hmuh dan nen a inrem hle bawk a ni.
Maguire hian 2025-26 campaign chhung khan thla 12 daih contract pawhsei ziah mah se, tun season tawp, nakkum nipuiah hian Old Trafford-a a contract neih lai hi a zo tawh dawn a. Chutiang dinhmuna ding mek ni mah se, head coach Michael Carrick-a hnuaiah Lisandro Martinez leh Luke Shaw te nen United first-team squad tlar hnung lailia player pawimawh berte zinga mi an la ni tlang reng a ni.
Shaw, Martinez leh Maguire te hian England leh Bayern Munich striker Kane hi kawng hrang hrangin an lo tawn tawh ṭhin a. Maguire leh Shaw te chuan United-in lak luh an lo tum tawh Kane hi England national team aiawhin an lo khelhpui tawh a, chutih rualin club level-ah erawh hmelma angin khelmualah an inhmachhawn ṭhin thung. Argentinian defender Lisandro Martinez thung chuan kum 33 mi Bayern Munich striker hi Tottenham-a a awm lai khan club level-ah a lo hmachhawn tawh a, kumin nipui World Cup inelna an neih ṭum pawh khan Argentina tana a feh chhuahnaah England hmachhawnin Kane hi a lo hmachhawn tawh bawk a ni.
Viaplay nena zawhna leh chhanna an neihnaah, Maguire hi football chungchanga zawhna hrang hrang zawh a ni a, chung zinga pakhat chu a hmachhawn tawh zinga striker beih harsa ber a ni. United defender hian kum 2023-a Bayern Munich zawmtu Kane aia hming dang rilrua lang a neih loh thu a sawi a ni.
Maguire-a fakna hian Luke Shaw-a'n khelmuala Kane-a theihna a lo fak tawhna chu a rawn nemnghet nawn leh chiah a, Shaw hian he striker hi a chet vel dan zawng zawng enin "khawvela a ṭha ber" ti hialin a lo sawi tawh ṭhin a ni. Kum 2021 khan The Daily Mirror hnenah Shaw chuan, "Ka tan chuan Harry hi khawvela striker ṭha ber a ni. He team tana mi pawimawh em em a ni a, a nihna takah chuan team pum pui tana pawimawh ber a ni hial ang. A theihna sang berah awm mah se, awm rih lo mah se, kan tana player pawimawh tawpkhawk a ni reng a ni," tiin a lo tarlang tawh a ni.
Maguire leh Shaw te ang thovin khelmual khata ram tana khelhpui ve ngai lo mah se, Man Utd defender Martinez pawhin Tottenham-a a la awm lai khan he England captain theihna hi a lo hre chiang hle tawh bawk. Kum 2022-a Old Trafford-a Tottenham laka 2-0 a United an chak ṭum khan Manchester Evening News hnenah Martinez chuan, "Zanin chu kan tlar hnung a nghetin kan khel ṭha hle chuan ka hria. Tottenham hian league-a player ṭha ber berte zinga mi an kawl a; theihna sang tak nei, chak tak leh ball thiam em em vek an ni. Mahse zanin chu inkhel kan thunun tlat a ni," tiin a lo sawi tawh bawk a ni.
Kane hi khawvel huapa striker ṭha berte zinga chhiar reng a ni a, Tottenham striker hlui hian United tlar hnung vengtu Maguire, Shaw leh Martinez-te rilruah theihnghilh theih tawh loh tur sulhnu nghet tak a hnutchhiah a ni.
